Gihangop sa Kapitolyo ug Emergency Operation Center (EOC) sa Cebu City ang kamandoan sa Inter Agency Task Force (IATF) kalabot sa pagtugot na sa intrazonal travel niadtong mga pasahero nga kompletong nakapabakuna batok Covid-19.
Kini subay sa IATF Resolution 124-B nga alang sa intrazonal travel sa mga nakakompleto na sa bakuna mo-presentar sa ilang Covid-19 domestic vaccination card, o certificate of quarantine completion nga nagpakita sa vaccination status sa maong indibiduwal nga giluwatan gikan sa Bureau of Quarantine.
Igo na ang maong dokomento ug wa na kinahanglana ang testing requirement atol sa ilang pagbiyahe sa nagkadaiyang destinasyon sa nasod.
Apan giklaro sa Cebu Provincial Government nga kadtong mga Sugboanon nga gikan abroad mahimong maka-presentar sa vaccination card apan kinahanglan gihapong mopaubos sa swab-upon-arrival policy.
“Those who wish to return to the country will just undergo a seven-day facility-based quarantine upon arrival instead of 10 days, however, this rule only applies to passengers arriving from what the IATF calls as “green countries, which are considered as low-risk areas for Covid-19 transmission,” pahibawo sa Provincial Information Office.
Samtang si Cebu City Councilor Joel Garganera, deputy chief implementer sa EOC nagkanayon nga ang resolution sa national IATF maoy nagpalig-on sa ilang rekomendasyon niadtong Hunyo 14 nga dili na pangayuan og RT-PCR test, swab test ug ubang medical requirement ang mga fully vaccinated individuals paglabay sa 14 ka adlaw human sila katapusang gibakonahan sa higayon nga sila mobiyahe.
Matod ni Garganera nga ila nang naduso ang maong EOC resolution nga adunay samang katuyoan sa resolution sa IATF national nga gipagawas sa niaging adlaw ngadto sa buhatan ni Mayor Edgardo Labella.
Samtang dakong hagit sa kapulisan sa siyudad sa Sugbo ang maong IATF resolution 124-B
Matod ni Police Lieutenant Colonel Wilbert Parilla nga unsaon sa pagsiguro nga ang mga byahedor gikan sa laing rehiyon tinuod nga siya nabakonahan bisan nakapakita siyag vaccination card.
“Ang atoa nalang nga problema karon is those coming from other regions, because kung sa region 7 lang walay problema because DOH 7 has the records but those coming from other regions diha ta magka problema.” matod pa ni Parilla. (ANV, PAC, AYB)