Delos Reyes: Duterte vs Pacquiao
MAAYONG adlaw sa tanan, sa atong mga Super Suki. Kumusta mo diha?
Mibiya si Senador Manny Pacquiao sa nasud aron mag-ensayo, pangandam sa iyang umaabot nga bugno ibabaw sa ring kontra kang Errol Spence Jr. didto sa T-Mobile Square sa Nevada, Los Angeles sa moabot nga Agosto 21 sunod bulan.
Sa edad nga 42, si Pacquiao dunay 62 ka daug, 7 ang pildi ug 2 ang draw, 39 knockout nga rekord ibabaw sa ring samtang si Spence sa edad nga 31, dunay 27 ka daug, walay tatsa nga rekord ug 21 sa iyang mga nakaatbang ang gipildi pinaagi sa knockout.
Sa umaabot nga away, singko milyones dolyares ang dawaton ni Pacquiao, mas ubos kay sa iyang nadawat sa panahon nga siya batan-on pa apan paigo na kini nga iyang kitaon karon nga panahon sa panademya.
Hinuon duna pa siyay dawaton nga bahin sa pay-per-view nga mamahimong iyang ikasagang sa iyang gastuhon kon ugaling modayon siya'g dagan pagka-presidente sa nasud sa 2022 Presidential elections.
Modaog ba kaha siya sa iyang away kontra kang Spence? Dili pa nato matagna apan daghan sab ang mga mahinamon nga nagasunod ug nagapaabot sa sangputanan niining awaya.
Makapukos ba kaha si Pacman sa iyang pag-ensayo ug inig abot sa oras sa ilang pangbugno ibababw sa ring?
Mibiya si Pacquiao sa nasud nga nagdala og kabalaka unsay dangatan sa ilang pagbikil sa politika ni Presdient Rodrigo Duterte tungod sa iyang pa`mahayag nga mas nilala ang kurapsiyon, tulo ka pilo sa panahon ni Pangulong Digong.
Sa iyang paggikan, nibilin siya'g mga dokumento sa Senedo kalabot sa mga ahensiya sa gobyerno nga iyang buot ipa-imbestigahan tungod sa kurapsiyon apan dili mahimo ang pag-imbestiga sa mga senador kon wala siya. Gikinahanglan ang iyang presensiya aron pamatud-an ang iyang alegasyon kon duna tinuod siyay pruyba.
Sa atong yano nga panan-aw, dako ang epekto sa maong suliran nga iyang ginaatubang tungod makaapakto kini sa iyang political career labi pa nga nagpasibaw na siya nga modagan pagka-presidente sa umaabot nga eleksiyon.
Sa iyang pagbalik sa nasud, laing bugno na sab ang iyang atubangon kontra kang President Digong nga nanganti nga iyang adlaw-adlawon ang pagbatikos kang Pacquiao.
Mipakita pa og sukol si Pacquiao apan nisugod na pag-ulan ang mga pagbatikos kaniya sa social media. Si Pangulong Digong mismo ang nagsulti nga sa natad sa pagpamoksing maayo si Pacman apan wala pa siyay kabangkaagan sa natad sa politika o panggobyerno.
Makasugakod kaha si Pacman niining laing bugno nga iyang gisudlan?
Atong paabuton sa iyang pagbalik unsay dangatan sa iyang political career, mo-level up ba siya o matinuod ang bahad ni Digong nga iyang pangunahan ang pagbutyag sa tanan nga iyang nahibaw-an kang Pacquiao ug ang mga bakak nga iya pang ibutyag kontra sa senador sa umaabot nga mga adlaw samtang nagkaduol ang eleksiyon.