NAG-VIRAL sa social media ang mala-beauty pageant nga paggawas sa usa ka recovered patient sa Covid-19 kinsa miyembro sa lesbian, gay, bisexual and transgender (LGBT) sa isolation facility sa Lambayong, Sultan Kudarat niadtong Martes, Hulyo 7, 2021.
Mora'g Miss Universe si Maximo "Babet" Limbaga, 49, nga migawas sa isolation facity human siya mirampa.
Nagsuot og personal protective equipment (PPE), korona ug taas nga kapa si Limbaga samtang garampa kon diin dunay mga confetti sab nga gipanghulog gikan sa taas ug dunay dakong tarpaulin.
Gitunol kang Babet ang usa ka bouquet, medalya ug certificate alang sa katapusan niining 14-day quarantine dayon misakay sa iyang kotse pauli sa ilang balay.
Si Babet usa ka online seller, mag-uuma ug usa ka sakop sa LGBT community apan single father sa tulo niini ka mga anak.
Sumala ni Babet nga maayo ang iyang kinabuhi ug gusto lang niyang mahimong lingaw ang iyang paggawas sa quarantine facility nga daghan ang mitabang kaniya aron nga mamahimong bongga ang send-off.
Dako man ang kalipay ni Babet sa iyang paggawas ug pagka-recover sa Covid-19 apan naguol gihapon kay daghan ang iyang mga naka-close contact diin walo sab ang nagpositibo apil ang iyang 88-anyos nga inahan ug kamanghurang anak.
Una siyang nakasinati og simtomas sa dihang gikalintura og halos duha ka semana.
Nagpa-test siya, apan una pa man migawas ang resulta, miapil pa siya og kalihukan sa LGBT ug Philippine National Police sa pagpanghatag og ayuda hinungdan daghan ang iyang mga naka-close-contact. (Edgar E. Fuerzas)