Mibalhin og training camp ang tulo ka teams sa Philippine Basketball Association (PBA) gumikan sa mga aso ug abog nga gipangbugwak sa bulkang Taal.
Gipangtumbok mao ang Magnolia Pambansang Manok Hotshots, Phoenix Pulse Fuel Masters ug Blackwater Bossings.
Ang Hotshots mibiya sa STI Lipa ug mibalhin sa Batangas State University, ang Fuel Masters mitabok gikan sa STI Lipa ngadto sa Malarayat Golf and Country Club santang ang Bossing mibalhin gikan sa Esplendido sa Laurel, Batangas ngadto sa Summit Point Country Club sa Lipa.
Ang PBA staff members miingon nga ang Hotshots ug Fuel Masters maoy nag-atubang og mas delikadong sitwasyon gumikan kay nahimutang ang STI Lipa gym sa ikawalo nga andana sa edipisyo sa tunghaan.
Matod sa Philippine Institute of Volcanology and Seismology nga kagahapon sa buntag, adunay narekord nga mubong erupsyon sa bulkang Taal nga nagbugwak og abog sa hangin nga adunay gitas-on nga 300 meters.
Basi sa 24 oras nga pag-monitor sa Phivolcs, moabot sa 55 volcanic earthquakes nga aduna ra hinuon hinay nga pag-uyog sa yuta ang ilang natali.
Sa laing bahin, malaumon ang PBA nga maaprubahan ra sa Inter-Agency Task Force ang ilang tinguha nga makasugod sa 46th season ning buwan sa Hulyo, 2021.
Ang PBA padayon sa pagbakuna sa ilang mga miyembro ug pipila ra ang nasutang mga positibo.
“Very minimal ang nag-positive. Out of over 400 tested, only six turned out positive; dalawa asymptomatic and the rest with mild symptoms requiring no hospitalization. At okay na sila ngayon,” asoy ni PBA commissioner Willie Marcial nga napatik sa www.pba.ph.
Ang PBA nakigtambayayong sab sa Games and Amusements Board ug Metro Manila Development Authority alang sa paghan-ay og plano aron mahapsay ang ilang pagpahigayon sa 4th season taliwala sa padayong hulga sa pandemya. (ESL)