Gitakdang mobalik na ang beteranong Cebuano singer-composer nga si Rolly Wagas sa nataran sa musika sa Sugbo bawon ang labing una niyang album human sa 15 katuig nga nawa siya sa Pilipinas.
Ang tanan niyang kanta sa “Bayani Ka” iyang gi-compose ug gi-record sa Elk Grove, California, USA diin siya nagbase sukad niadtong 2006 ug no less than ang Grammy-nominated producer/sound/film/mastering engineer nga si Marc Daniel Nelson ang nakig-alayon niya sa maong proyekto.
“Mga client ni Marc silang Jason Mraz, Fleetwood Mac, Barry Manilow, just to name a few. Mixer ug music scorer usab siya sa pelikulang Blade Runner, Point Break ug uban pa. Higante sa Hollywood ning tawhana,” paambit sa 54-anyos nga si Rolly kansang signature hit ang “Sugbo” nga gikan sa iyang katapusang album niadtong 2004.
“Kanunay ko nagsunod sa online tutorial ni Marc Daniel Nelson sa YouTube bahin sa technical aspect kay duna man koy recording studio sa balay. Nisuway ra kog email niya apan wa ko magdahum labi na nga independent artist/producer lang ko ug samot na nga dili gyud ko ka-afford sa iyang rate. Apan sa wa palandonga nitawag siya nako ug ingon siya willing siya motabang apan sa usa ka kondisyon. Kana kon makauyon siya sa akong kanta. Dako nakong kalipay nga nakauyon siya sa sample tracks nga gitawag niyang `classic’ tungod sa mga instrument nga akong gigamit. Sa tabang sa akong brother nga si Ritchie nga maoy executive producer, nakuha namo si Marc.”
Si Rolly dili lang drummer, keybordista ug gitarista apan hanite usab siya sa harmonica, flute, mandolin, ukulele, percussion (bongo, shaker), ug tribal instruments sama sa kubing ug bamboo flute. Nabaid siya sa Anakpawis Band nga gilangkoban sa iyang mga igsuong Ritchie, Edwin ug Michael. Si Rolly manghod nilang Ritchie ug anhing Gilbert Wagas nga parehong nahimong mayor niadto sa lungsod sa Compostela.
Ang “Bangon ug Padayon” sa Anakpawis Band niadtong 1989 ang labing unang album ni Rolly samtang ang “Bayani Ka” ang iyang ikaunom. Na-feature usab ang iyang kanta sa “Anak ng Bayan” album niadtong 2002 kauban silang Gary Granada, Cookie Chua, The Jerks, ug Musikang Bayan. Isip solo artist lakip sa iyang nakauban silang Noel Cabangon ug Asin.
Ang “Bayani Ka” album ang buhing saksi sa way kamatayong gugma ni Ka Rolly sa Visayan music kay bisan pa sa pandemya ug pila ka milya niyang gilay-on, ang kalampusan gihapon sa atong musika ang iyang gihandom nunot sa gimithi niyang kalamboan sa tanan sa industriya.
Rolly Wagas, Ssssuper Ka!
Unsay sud sa imong bag-ong album?
Ang “Bayani Ka” naghubit sa kinabuhi sa mga OFW. Lakip sa sulod niini ang “Katabyaw” (Katabang sa Langyaw) nga bahin sa mga domestic helper; “Tatay” nga OFW ug sa gibiyaan niyang anak; ug “Mama” (Ninfa) nga akong gihalad sa akong inahan nga nipanaw na sa miaging tuig isip pasidungog sa iyang pagka-Bayani sa among pamilya ug sa tanang mga inahan sa kalibotan.
Nganong nibiya diay ka sa Pinas?
Ang akong asawa nga registered nurse, na-hire sa USA niadtong 2006 diin kuyog ang pamilya sa job offer niadtong panahona. Bisan wala koy gana nga mobiya sa Sugbo ug manimpad sa laing nasud ilabi na nga at the height `to sa akong pagka Bisaya artist nibiya ko tungod kay giuna nako ang akong pamilya. Last nakong bisita sa Cebu last year, labi na sa akong lungsod sa Compostela.
Wala kay planong mosunod sa tunob sa imong mga igsuon sa pulitika?
Sa pagkakaron wala koy plano kay mas prioridad nako ang akong musika. Bisan wala ta sa gahum padayon man gihapon tang makatabang sa atong mga katagi-lungsod pinaagi sa akong Community Outreach Program.
For good na ni imong pagbalik?
Plano ko mouli karong tuiga aron sa pag-promote sa akong bag-ong album ug kon itugot sa kahigayonan (pandemic policies) mag-concert tour. Magpanday usab kog mga negosyo bunga sa kinitaan sa akong music business sa America ug sa akong kapikas sa kinabuhi. Sa dili madugay mobalik na ko “for good”, kay naa gyud nalansang sa yutang natawhan ang akong kasingkasing. Ako lang una ang mag-base sa Cebu ug moduaw lang ko sa Amerika sa matag-karon ug unya.