Human sa gipahigayon nga tigom tali sa Kagamhanan sa Lalawigan sa Sugbo, lokal nga kagamhanan sa lungsod sa Badian ug mga turista nga nipadayag sa kasagmuyo sa nasinati sa pagsuroy sa Kawasan Falls, naplantsa kini ni Gobernador Gwendolyn Garcia.
Si Garcia mao ang nangulo sa tigom tali sa LGU ug lokal nga mga turista nga gipahigayon sa lungsod sa Alcantara.
Usa ka turista uban sa mga barkada niini ang nipadayag sa ilang kasagmuyo tungod sa giingong kamahal sa bayranan sa pagsuroy sa Kawasan Falls nga usa sa mga iladong tourist destination sa Lungsod sa Badian.
Nagpasayloay ang LGU ug mga turistang nangreklamo atol sa tigom nga gipatung-an sa gobernador.
Gihulagway nga miscommunication ang nakaingon sa hitabo.
Nikatap sa social media ang video sa usa ka turista nga giingong usa ka vlogger nga ginganlan og “YayaSosyalera”.
Nipadangat siya ug ang iyang mga barkada sa ilang concern sa giingong kamahal sa mga bayronon sa pagsuroy sa falls.
Gawas sa entrance fee nga P50, gikinahanglan usab silang mobayad sa tour guide nga matod pa wala gyud mo guide kanila.
Butang nga giangkon usab sa tour guides ug LGU.
Gawas sa pagduaw sa tulo ka levels sa falls sa Kawasan, gimahalan usab ang turista sa water tubing nga giingong P300 ang bayad matag tawo. Dili kini susama sa rate sa nangaging bulan nga P100 lang.
Atol sa tigum, gipasabot ni Donald Villarin, tourism officer sa lungsod nga ang water tubing gipanag-iya sa pribado ug promo lang ang P100 nga rate sa niagi. Sa nasayran P250 ang regular rate per head alang sa maong water activity.
Ang management sa Kawasan adunay gitanyag nga duha ka package alang sa mga bisita.
Ang package A nga rate naglakip sa P55 matag guest, P50 nga life vest, mamahimo usab nga magdala og kaugalingong vest ang guest ug tour guide fee P200 alang sa tulo ka oras nga tour guiding services alang sa pito ka guests.
Sa Package B, P350 per guest, apil na niini ang entrance/user’s fee, P55; life vests, 50; slides and swing, P20, share sa Barangay Matutinao, P25; share sa Barangay Balhaan, P12.50; ug share sa Barangay Sulsogan,P12.50.
Miangkon sa tagsa tagsa ka sipyat ang duha ka habig ug nisaad kini nga mag areglo aron mas mapalambo pa ang turismo sa lungsod og sa tibuok lalawigan.
“Ani nalang, mangayo kog sorry sad sa amoa nga side nga ingun ato but love local gyud mi,” matod ni Yaya Sosyalera.
Ang gobernador, sa iyang bahin, nipasabot nga gikinahanglan ang pagsinabtanay ug ang paghiusa sa mga Sugboanon ning panahon sa pandemya diin tanan ang na apektohan ug labihang apektado usab ang tourism industry sa lalawigan.
Gisugyot ni Garcia nga mopasar og ordinansa ang konseho sa lungsod sa Badian aron mahan-ay ang mga lagda nga angay tumanon sa mga turista.
Nalipay hinuon si Garcia ug mga opisyal sa LGU sa hapsay nga diskurso nga milugdang sa pagpinasayloay ug pagkasinabot nga motabang ang mga turista sa pagpahibaw sa publiko sa kaanyag sa probinsya.
“For something nga nagsugod sa bati atong humanon nga maanindot...Mao ni akong gitinguha nga magkasinabot ta. Kita kita raman dinhi sa Sugbo, mga Sugboanon. Sayod ta nga sa tibuok nasud, kita sad ang gitan-aw kay kita ray nibarog tungod sa panginabuhi, mga negosyo nga naundang, labi na gyud ang turismo,”matod ni Garcia. (ANV)