Pila na ka nangaging mga Philippine National Police (PNP) chief ang mihimo og lakang aron malimpiyuhan ang imahe sa atong kapulisan. Kini aron mobalik ang kompiyansa sa publiko ngadto sa kapulisan. Ang PNP maoy usa sa mga government organization nga gitumbok nga naghitak ang kurapsiyon, sulod ug gawas sa organisasyon. Kining kurapsiyon daghan kaayo og dagway.
Kon maghisgot ta og kurapsiyon sulod sa organisasyon mao kanang pagpangawkaw mismo sa pundo sa PNP sa mga tag-as nga opisyal. Sama anang intelligence funds nga way audit. Gikan sa Camp Crame gikapnan na og katunga sa mga opisyal didto. Inig abot sa rehiyon, kapnan pa og katunga sa dili pa ihatag ngadto sa mga city ug provincial directors. Inig abot sa mga station commanders, sinsilyo na lang.
Kanang overpricing sa mga presyo sa pagpalit og armas, uniporme, pusas ug bisan usang kagamitan sa kapulisan apil na. Karong bag-o, gikonbikto sa Sandiganbayan ang retired nga tag-as nga mga opisyal sa PNP gumikan sa overpricing sa speed boats nga ilang gipamalit. Aduna pay overpricing sa mga sakyanan ug helicopters. Bisan budget sa office supplies sama sa computers, gidaginot pa.
Kurapsiyon sa gawas mao kanang pagdawat og payola o protection money sa mga illegal sama sa masiao, jueteng ug ubang mga illegal nga sugal. Payola gikan sa mga drug lord ug sindikato. Ingon man pagpangilkil sa mga negosyante bisan kon legal ang mga negosyo. Mangilkil ngadto sa mga tawo nga moduol kanila nga mangayo og panabang. Bisan sa pag-serve sa warrant of arrest, dili molihok kon way padangog. Kon makakompiskar og kuwarta gikan sa illegal sama sa sugal o drugas, dili idiga tanan kay kapnan.
Gawas sa mga abuso sama sa kalit lang mamusil, limpiyuhan ni PNP chief Guillermo Eleazar ang PNP batok sa salawayon nga mga elemento nga adunay mga kabit. Kon adunay legal o legitimate nga asawa nga moreklamo batok sa iyang bana nga pulis kay adunay kabit, andam paimbestigahan ni Eleazar. Kon mapamatud-an nga adunay kabit, iyang ipatangtang. Kon tinud-on kini, dili kaha mahurot ang atong kapulisan labi pa ang mga opisyal kay morag daghan man ang naghimo niini? Basin kutob lang ni sa estorya. (bobbygnalzaro@gmail.com)