Ang Environmental Management Bureau (EMB) 7 sa Department of Environment and Natural Resources (DENR) 7 niisyu og cease and desist order (CDO) batok sa RMI Solid Waste Management and Hauling Services nga nanag-iya sa transfer station nga nahimutang sa Barangay Inayawan, Dakbayan sa Sugbo, Hulyo 7, 2021.
Si Regional Director Lormelyn Claudio sa (EMB) 7 niisyu sa kamandoan gumikan sa daghang mga kalapasan sa kompaniya sa Ecological Solid Waste Management Act nga nakita sa inspectors sa ilang pagbisita sa transfer station sa mga basura sa Dakbayan sa Sugbo.
Ang EMB 7 nirekomendar og multa nga P105,000 tungod sa violation sa Environmental Compliance Certificate Nos. 2 ug 6 gikan niadtong 2017 nga kinahanglan bayran sulod sa 15 ka adlaw human naisyu ang kamandoan.
Ang P105,000 nga multa nagagumikan sa kapakyas sa kompaniya sa pag-submit og compliance monitoring reports (CMR) sukad niadtong 2017. Matag CMR nga di maduso, nagtangag og multa nga P10,000 matag usa.
Ang P25,000 alang sa ilang ECC condition number 6.
“Finally, pending compliance, respondent is directed to immediately cease and desist from further accepting waste in its facility,” tipik sa direktiba ni Claudio.
Kon dili tumanon sa transfer station ang CDO sa EMB, pahamtangan sila og P50,000 matag violation nga ilang nahimo subay sa ilang findings kon mobukas sila og balik nga wa makatuman sa kamandoan.