TALIWALA sa padayon nga pandemya sa Covid-19, giawhag sa City Health Office (CHO) sa siyudad sa Davao ang Dabawenyo nga di mokompiyansa sa ilang palibot human nga dunay lima ka mga tawo ang namatay tungod sa dengue karong tuiga.
Gisulti ni CHO-Tropical Disease Prevention and Control Division (TDPCD) head Beth Banzon sa paghinabi sa 87.5 FM Davao City Disaster Radio niadtong Miyerkules nga ang kaso sa dengue sa siyudad misaka ngadto sa 102 niadtong Mayo ug 133 sa Hunyo karong tuiga.
Base sa ilang dengue monitoring, gibutyag ni Banzon nga ang Talomo Poblacion nanguna sa listahan uban sa 22 ka kaso gisundan sa Sasa nga 15, ug Panacan (12).
Ubang mga barangay nga duna say mga kaso sa dengue mao ang Maa (11), Tibungco (10), Calinan Poblacion (walo), Bunawan (sais), Matina Crossing (sais), Mintal (sais) Catalunan Grande (lima), Daliao (upat), Tigatto (upat), Cabantian (upat), ug Wilfredo Aquino (tulo) samtang ang ubang barangay naay tag-usa ka kaso matag usa.
Gitumbok sa siyudad nga duna silay nadiskobrehan nga daghang puy-anan sa mga lamok atol sa ilang gihimong pagtuyok.
Giklaro ni Banzon nga tungod sa dengue, kinahanglan nga alerto kita sa tanang panahon. Ang kalintura di puwede nga balewalaon lang kay posibleng simtomas kini, di lang dengue apan lakip na sab sa Covid-19.
Matud pa sa opisyal nga ang una hangtud tulo ka adlaw nga kalintura mahimong indikasyon sa dengue ug ang ikaupat hangtud ikaunom ka adlaw maoy kritikal tungod ubang simtomas sama sa pagdugo sa ilong, sakit sa tiyan, rashes, dehydration ug pagsuka og dugo mosugod na nga masinati.