PBA andam mopahuwan og players alang sa Gilas

Abli ang pultahan sa Philippine Basketball Association (PBA) kabahin sa pagpahuwam sa ilang mga magduduwa ngadto sa Samahang Basketbol ng Pilipinas (SBP) alang sa kampanya sa Gilas Pilipinas sa 2021 Fiba Asia Cup nga ipahigayon karong Agusto 17-29, 2021 sa Jakarta, Indonesia.

Gipasabot ni PBA commissioner Willie Marcial nga wala pa sila masultihi ang SBP kabahin niini apan iyang giklaro nga andam silang makighugpong kabahin ning maong isyu.

“ASP (Al Panlilio) has yet to inform me about it but I’m open to it. We just have to discuss everything. We’ll talk about it but we’re open,” matod ni Marcial sa interbyu sa GMA News online.

Sa kasamtangan, ang Gilas Pilipinas gilangkuban og all-amateur squad nga gipangulohan nila ni 7’3” Kai Sotto, naturalized big man Ange Kouame, ug Filipino-American guard Dwight Ramos.

Bisan sa kabatan-on sa puwersa sa Gilas, nakamaneho gihapon kini pagharos sa ilang tulo ka mga tahas sa ikatulo ug katapusang tipik sa Fiba Asia qualifiers sa Clark, Pampanga diin kaduha niini gipukan ang South Korea ug kausa ang Indonesia.

Ningkombati sab ang batan-ong puwersa sa Gilas Pilipinas sa Fiba Olympic Qualifying Tournament sa Belgrade diin nakahatag sila og saktong kombati una kini mingyukbo sa world No. 5 Serbia.

Sa ikaduha nilang tahas sa OQT, ang Gilas Pilipinas nakatilaw og kastigo sa Dominican Republic.

Gipasabot ni Gilas coach Tab Baldwin nga sa kasamtangan, wala pa nila mahan-ay ang mga lakang nga ilang pagabuhaton alang sa ilang kampanya sa Fiba Asia Cup. (ESL)