KON eco-tourism ang tirada sa inyong laag ayawg sipyata sa pagsuroy ang San Vicente Marine Sanctuary sa Isla sa Olango, nasakop sa Lapu-Lapu City.
Gibana-bana nga 15 minutos ang biyahe luwan sa pump boat kon molabang sa Olango gikan sa mainland sa Lapu-Lapu.
Human nga gibuksan pagbalik sa Lapu-Lapu City government ang turismo sa mga milabayng buwan taliwala sa pandemiya gitinguha sa administrasyon ni Mayor Junard Chan nga mabuhi pagbalik ang eco-tourism sa isla sa Olango.
Usa na niini ang naila na nga San Vicente Marine Sanctuary.
Matagamtaman sa maong lugar nga makapaduol ngadto sa nagkadaiyang marine life, labong nga bakhawan ug masinate ang kabugnaw ug tin-aw nga dagat.
Haom sab ang maong lugar alang niadtong mag-educational tour ingon man niadtong mahilig mag-camping.
Aron nga moabot ngadto sa observation structure nga anaa nahimutang dagat molatay ang guests sa 500 metros nga gitas-on nga taytayan nga ginama sa kawayan nga manukad sa entrada sa marine sanctuary.
UNSAON PAG-ADTO?
Manukad sa Angasil wharf sa Barangay Mactan, Lapu-Lapu City diin mosakay og pump boat nga modungo ngadto sa Santa Rosa wharf.
Mokabat lang sa P45 ang back and forth nga pletehan sa pumpboat diin mas makadaginot kon mopalit daan og ticket sa pagpa-uli pinaagi sa discounted fare rate.
Sa pagdunggo sa pantalan sa Sta. Rosa adunay mga naglinya nga traysikol diin mobiyahe sa nagkadaiyang barangay sa isla.
P40 ang pletehan matag pasahero ug mokarga lang og duha ka pasahero ang matag traysikol unit sa ilang pagbiyahe aron sa pagtuman sa social distancing.
RATES
Sa reception area diha sa atubangang bahin sa sanctuary adunay mga activity options nga kapili-an sa mga mosuroy.
Sa pagmentinar sa kinaiyahan ang sanctuary maningil og environmental fee nga P200 alang sa 10 ka tawo ug makagamit na sa lamesa ug lingkuran sa observation structure.
Ania ang mga bayrunon:
* Boardwalk users fee (sightseeing only) – P30 matag guest / sulod lang sa 40 minutos
* Kon maligo – P80 matag guest
* Snorkelling – P180 matag guest
* Fishfeeding – P105 matag guest (sakay sa patrol boat ug aduna nay pan nga maoy ilawog)
* Paddle boat – P200 sulod sa usa ka oras
* Overnight camping – P200 matag guest (free ang boardwalk use ug tubig)
* Scuba diving – P3,500 matag guest (with boat ug instructor)
* Island hopping – P1,300 good for 8 person ug makasuroy na sa duha ka isla
Sa inyong paglingaw-lingaw gipahinumduman nga dili magpataka og labay sa inyong basura, ilabi na nga gitugot nga makadala og pagkaon sa observation structure samtang magkalingaw og pangaligo o ubang water activities sa sanctuary.