Hapit ang tanang butang mahimong pekehon. Gikan sa pilok hangtod sa fake nga police ug NBI clearance. Fake nga driver’s license. Fake rice, fake nga itlog. Ug karon, fake Covid-19 vaccination cards.
Gilugakan na unta sa Inter-Agency Task Force for the Management of Emerging Infectious Diseases (IATF) niadtong Hulyo 2 ang mga lagda sa pagbiyahe sud sa lain-laing probinsya sa Pilipinas niadtong kompleto sa bakuna batok sa Covid-19.
Ubos sa IATF Resolution no. 124-B, kadtong kompleto na sa duha ka doses sa bakuna di na kinahanglang mopakita pa og negative result sa Reverse Transcription-Polymerase Chain Reaction (RT-PCR) aron mobiyahe sa laing lalawigan. Ipakita na lang nila ang ilang Covid-19 vaccination cards.
* * *
Ang paglugak sa protocols sa pagbiyahe sa mga tawo nga kompleto na sa bakuna makadasig unta niadtong nag-ukon-ukon sa pagpabakuna nga magpabakuna na. Usa kini sa paagi mga makasuroy-suroy na sila sa ubang mga probinsya.
Hangtod sa Hulyo 5, 2.86 ka milyon o 2.6 porsyento pa lang sa mga Pilipino ang nakakompleto na sa bakuna.
Target sa gobyerno nga mabakunahan ang hangtod sa 70 ka milyon ka mga Pilipino aron makab-ot ang gitawag nga herd immunity. Apan usa sa mga butang nga nakababag niini mao nga wa pa mangabot ang dugang supply sa bakuna ug daghan sab ang di gustong magpabakuna.
* * *
Wa na untay hasol ang pagbiyahe kon Covid-19 vaccination card na lang ang ipakita. Apan nireklamo ang mga lokal nga kagamhanan kay di sila eksperto sa pag-ila kon tinuod o peke ba ang vaccination card.
Mao nga nimando og status quo ang Department of Health niadtong Miyerkoles. Sa ato pa, bisan kon kompleto na sa bakuna, kinahanglan gihapon nga magpakita og negative result sa Covid-19 kon mobiyahe ka.
Tungod lang kay nahadlok sila nga makalusot ang mga peke nga Covid-19 vaccination cards. Wa sila mahadlok sa peke nga negative result sa Covid-19? Tanang butang mahimong pekeon.