Duha ka gikatahapang mga durugista napatay sa kapulisan atol sa buy-bust sa Huwebes sa alas 8:30 sa gabii, Hulyo 8, 2021 sa South Road Properties (SRP) sa Barangay Mambaling, Dakbayan sa Sugbo.
Ang napatay giila sa kapulisan nga sila si alyas Ryan ug Kerlou Pojas, 22, taga sitio Fatima, Barangay Pusok, Lapu-Lapu City.
Si Police Colonel Regino Maramag, hepe sa Police Drug Enforcement Unit (PDEG) 7 niingon nga atol sa transaction, nakabantay ang mga suspek nga mga pulis ang ilang gika transact, namusil sila hinungdan sa pinusilay. Ang sakyanan sa PDEG maoy naigo, apan way naunsa bisan usa ka pulis.
Matod ni Maramag nga nangaigo sa nagkadaiyang bahin sa lawas ang duha hinungdan sa hinanaling kamatayon.
Si Maramag niingon nga mga usa ka buwan kapin nga ilang gipanid-an sila si alyas Ryan ug Pojas.
Human nila makompirmar, ni-transact dayon sila kang Ryan og usa ka kilo nga shabu.
Ang duha ka mga durugista gusto nga sa karsada sa eskina padung sa Department of Public Services (DPS) sa entrance sa SRP habig sa Barangay Mambaling nga ngitngit, ipahigayon ang transaction.
Dihang nahitabo na ang transaction, nakuha na nila ng drugs ug nabayran sila si Ryan ug Pojas, kalit lang kining namusil sa poseur buyer, kinsa wa maigo.
Ang back-up team maoy nibawos kanila ni Ryan.
Gawas sa usa ka kilong drugas, dunay laing 3.5 kilo nga nakuha gikan sa awto nila ni Ryan ug Pojas.
Ang tanan mobalor og P30.6 million base sa Dangerous Drugs Board (DDB0 value.
Gawas sa illegal drugs, nakuha usab gikan sa duha ang usa ka KG9 submachine pistol nga dunay silencer ug usa ka kalibre .45 nga pistola.
Si Maramag niingon nga ang duha kauban sa laing mga durgugista nga ila usab nga napatay sa laing drug transaction sa Talisay sa miaging buwan, apan sa Transcentral Highway (TCH) habig sa dakbayan sa Sugbo na naapsan.
Si Police Regional Office (PRO) 7 chief Brigadier General Ronnie Montejo, sa interbyu sa Superbalita Cebu, nibutyag nga ang illegal drugs gikan sa grupong Bilibid 19 sa New Bilibid Prison sa Muntinlupa City.
Gipadala kini dinhi sa Sugbo pinaagi sa freight tipon sa mga kargamento nga gisakay sa barko ug gi-consign kang Pojas.
Pagdunggo dinhi, hayan wa maayo pagkahiling ang mga kargamento hinungdan nga nakalusot. Matod ni Montejo nga dako nga grupo sa durugista sa NBP, apan ila pang sutaon unsa nga grupo nahisakop ang duha dinhi sa Sugbo.
Si Montejo niingon nga sa ilang background checking sa duha, ilang nasuta nga gawas nga dagkong pushers, mga hitman usab kini.
Ang mga pusil nga nakuha gikan sa duha di mga basta-basta ug duna pay sakyanan mao nga niingon si Montejo nga nagpailang di ordinaryo ang grupo.