Sa iyang ikatulong State of the City Address (Soca) sukad siya niasumer sa katungdanan, gipikhan ni Lapu-Lapu City Mayor Junard “Ahong” Chan ang iyang kanhi mga higala ug kauban sa partido nga sila si kanhi mayor ug karon Kongresista Paz Radaza ug kapikas niini nga si kanhi kongresista Arturo Radaza tungod sa giingong “napasagdan” nga mga problema.
Gikan sa mga karsada nga gagmay nga wa tagda kay nagsubay sa “pribadong mga luna” ngadto na sa paghuman sa Lapu-Lapu City Hospital ug socialized housing projects, si Chan niingon nga kini nga mga proyekto mahimo ra untang himuon ug tiwason kon gitutokan pa sa mga Radaza dihang sila nangatungdanan pa isip mga mayor sa siyudad.
“Sulod sa 18 ka tuig nga gipasagdan sa kanhi namunoan sa dakbayan ang Lapu-Lapu City Hospital, karon dako na kaayo og kausaban. Gikatakda nga mahuman unta kini niadto rang 2017, pero tungod kay wala kini tagai og igong pagtagad sa kanhi administrasyon, gibiyaan kini sa contractor ug maoy atong nakita sa atong paglingkod nga 50% pa lang ang agi sa konstruksyon sa Phase 1 niini,” matod ni Chan.
Apan sa iyang pag-asumer, iya dayong gitutokan ang pagpadayon sa pagtukod sa tambalanan nga karon napahimudsan na sa mga Oponganon.
“Fueled by my passion to provide quality health care to the Oponganons, ako gyud dayong gitutukan ang maong proyekto. Subsub natong gimonitor ang konstruksyon niini, ug karon nahuman na ang Phase 1 and Phase 2 sa atong bag-ong Lapu-Lapu City Hospital building,” dugang ni Chan atol sa iyang Soca.
Gigahinan ang phase 3 og pundo sa Department of Health (DOH) 7, apan kay di kini igo sa paghuman, nangayo siya og dugang pundo kanila ni Senador Bong Go ug Sonny Angara.
Gawas niini, nag hire usab ang Siyudad og mga medical specialist aron mohatag og libreng serbisyo sa panglawas alang sa mga kabos.
Iya usab nga gipasigarbo ang Santa Rosa Hospital nga duna nay emergency room ug cadaver area. Nakapalit usab og mga ambulansya ang Siyudad nga gipangtugyan ngadto sa mga barangay.
Ubos sa Ahong Cares Bayanihan Project, matod ni Chan nga nakalusad kini og 71 ka road concreting project nga way gasto ang Siyudad.
Matod niya nga “tubag sa kanhi namuoan, 'wala kitay mabuhat niana kay kana gipanag-iya sa pribado.' Sayon ra nila pag-eskapo sa maong problema. Ang mga pobreng Oponganon, igo nalang intawn sa pagdawat sa maong polpol nga rason,” matod ni Chan.
Matod niya nga mokabat sa 20 kilometro nga karsada ang nasemento ubos ning proyekto.
“Sa kinatibuk-an, aduna kitay 71 ka road concreting projects ubos sa Ahong Cares Bayanihan Project. Suma total, kapin sa 20 ka kilometro na nga karsada ang atong nasemento. Gawas sa road concreting, aduna pud kitay napatukod nga 10 ka drainage projects ug 3 ka panimalay usab ang atong napabarong pinaagi sa bayanihan.”
Iya usab nga gipasigarbo nga ang isla sa Olango karon duna nay stable nga supply sa kuryente nga sud sa daghang katuigan, wa matagad.
Nasulbad kini pinaagi sa pagtukod sa Olango Power plant.
Mga lumolupyo sa mga isla sa Caubian, Caohagan ug Pangan-an nga wa maabot sa serbisyo sa Mactan Electric Company (Meco) gipahatdan niya og mga solar panel set aron makasuga ang tagsa ka mga balay.
Samtang sa di madugay, gipahibawo ni Chan nga makabaton na og luwas ug maayong mga pinuy-anan ang mga lumolupyo nga naa namuyo daplin sa kabaybayunan sa Siyudad.
Sila ang mag-unang beneficiary sa tukuron nga socialized housing.
Ang motukod sa housing project nga pabarugon sa Barangay Canjulao mao ang Premium Mega Structure Incorporated.
Ang proyekto tipik sa 203-hektaryang reclamation project nga tukoron sa Barangay Canjulao ug Punta Engaño.
Joint venture kini tali sa Siyudad sa Lapu-Lapu ug Mactan Blue Waters Development Consortium.
Pabarugon sa reclamation ang “little Hong Kong” pinaagi sa paghimo sa lugar nga business hub sa Siyudad.
“Niadto pang panahon ni President Gloria Arroyo gideklara ang maong dapit isip socialized housing site, pero sulod sa 18 nga wala kini tagai og pagtagad sa kanhi namunoan sa dakbayan, ato kini karon gisubhan aron matagaan na og katumanan ang dugay na nga gihandum sa atong mga kaigsuonang kabus nga taga dakbayan, ilabi na kadtong peligro nga nanimuyo daplin sa kabaybayonan,” matod ni Chan. (REV)