DILI masukod ang gibating kasubo sa amahan ug tibuok banay sa military nurse nga taga Davao City nga apil sa namatay sa nahagsa nga C-130 plane sa Sulu.
Biyernes sa buntag, Hulyo 9, 2021, sakay sa C-295 aircraft sa Philippine Air Force (PAF), miabot sa Davao City ang patay'ng lawas sa Military Nurse nga si First Lieutenant Sheena Alexandrea Tato sa Davao Air Station, Headquarters Tactical Operations Wing (TOW) Eastern Mindanao sa Barangay Sasa, Davao City.
Isip pagrespeto, gihatagan og full-military honor si Tato sa iyang mga kaubanan nga gipangunahan ni Philippine Air Force Deputy Wing Commander, Colonel Jesus Nelson Morales, PAF (GSC).
Dala pa sa amahan ang hulagway sa anak ug nagbakho kini samtang nakitang patugpa na ang eroplano nga gisakyan sa patay’ng lawas sa iyang anak nga gisulod sa lungon ug gidala dayon sa St. Peter's Funeral Homes.
Si Tato usa ka military nurse sa Philippine Air Force nga na-assign sa Air Force General Hospital, 520th Air Base Wing, Col Jesus Villamor Air Base sa Pasay City isip Duty Nurse-in-charge sa Air Evacuation Section.
Nahimo siyang opisyal niadtong Disyembre 1, 2015 with flying colors ug usa sa mga top students sa ilang klase. (Jeepy P. Compio)