PIPILA ka lugar sa Siyudad sa Davao ang gibaha Biyernes, Hulyo 9 2021, human nga nagbuntag og bunok ang ulan sukad pa sa Huwebes sa gabii.
Kini human nga mitaas ang mga tubig sa kasapaan nga nagsumpay sa Davao River sukad pa sa gabii.
Alas 11:39 kagabii, Huwebes, misaka na sa kritikal level ang tubig sa Matina Pangi River hinungdan nga gimandoan ang mga personahe sa Barangay Disaster Risk Reduction Management Centers sa Barangay Matina Crossing ug Barangay Matina Aplaya mangandam ug magmonitor sa ilang lugar sa posibleng pag-awas sa may Balusong River.
Mga alas 5 sa buntag, Biyernes, namatikdan nga padayon ang pagtaas sa tubig sa Davao River nga naa sa alert level na ilabi na didto sa Barangay Tamugan river channels, hinungdan nga tanang Barangay Disaster Risk Reduction Management Council subay sa Davao River channels gimandoan nga hugtan pa ang pagmonitor sa ilang mga area of responsibility, mangandam sa ilang mga kagamitan ug imonitor ang sitwasiyon sa ilang mga lugar.
sa alas 7:40 sa buntag, Biyernes, mga biyahero sa may Bunawan ning siyudad, naglisud na og tabok sa highway sa dihang mitaas ug miawas ang tubig sa Bunawan River.
Hinuon, naka-standby ang Urban Search and Rescue team sa Central 911 sa pag-rescue kon ugaling dunay mga na-trap sa baha.
Nasayran nga daghang mga namuyo sa daplin sa maong sapa ang hinay-hinay nang gipahikling. (WGM/JPC)