KARONG bag-o gisaulog ang ika 55 ka tuig nga kasumaran sa pagkahimugso sa Bombo Radyo. Dako nakong dungog nga nahimong tipik ning inilang network sa tibuok kapupud-an.
Akong yukbo sa tagdumala ug mga kawani atol ning inyong kasaulogan. Dinhi ning maong sibyaanan una ko nakat-on sa propisyon sa panibya sanglit lahi man ang kurso nga akong gieskwelahan.
Sa group chat sa Bombo Radyo Academy may mubo ko nga sugilanon nga gipaambit ngano nga nasud ko ning kalibutan sa panibya.
Una, wa gyud ni sa plano bisan niadtong namili pa ko og kurso. Pero wala palandunga kay ang Bombo Radyo may nangita nako aron ma-interview.
Dako ang akong kahibulong kay wala man ko ni-apply pagka reporter.
Ang giingon kay nag-submit ko og bio-data ug ni-qualify ko para sa interview.
Kinsa may nag-submit sa bio-data? Kay nagpuyo man ko og boarding house niadtong panahona, ang akong ka boardmates maoy dali nakong napasanginlan.
Sa boarding house man gud, dili malikayan nga maka kurom ang mga hilig moinom. Sa korum naa pud ang music naagi sa radio cassette.
Daghang higayon nga ang radio cassette maoy pahimungtan sa mga diskusyon pinaagi sa pag-record niini. Ang alegre unyag replay sa girekord nga diskusyon diin kunohay ako ang host. Dagko kaayo mig katawa sa among gibuhat.
Base sa ilang nabati sa tape recorded nga diskusyon ang akong boardmates, nagtuo nga angayan ko nga manarbaho og radyo. Hugot kong namalibad. Gawas pa naa sab koy trabaho.
Natayming lang nga taastaas ang akong bakasyon mao nga nakighugoy hugoy ko nila.
Pero luyo sa akong pamalibad naka-submit na diay sila og bio-data sa sibyaanan nga dili layo sa among boarding house. Blind ko sa ilang diskarte samot na sa ilang convincing power nga maoy nakapatabdo nako aron ma-interview.
Nasayran nako nga sa carenderia kilid sa boarding house nila nahibaw-i nga nangita og reporter ang Bombo Radyo. Diehard listener ang nagdumala mao nga nadunggan nila didto ang plugging labot sa hiring.
Salamat Bombo Radyo sa pagsalig. Dinhi ko nakat-on pagka reporter, newscaster, komentarista, researcher, sports commentator, ring announcer, pagtabang sa mga biktima sa kalamidad ug pagka responsabli nga mediaman.
Salamat sab sa pagsalig sa boardmates. Usa nila tua na sa laing kalibutan. Gusto man unta ta mong hinganlan, pero nagtamod ko sa atong sabot nga dili masulat o masibya inyong mga pangalan.
Puhon magkita kita ta og usab unya mag-record tag balik nga kamo gihapon ang akong guest. Di pa tungod ninyo wala ko ning maong matang sa public service.