NAHIBULONG ang ginikanan ni Boding (tinuod ngalan gitago) kay wa namay ganang moeskwela unya nagpunay na lang mukmok og katulog sa iyang ngitngit nga lawak.

Nangayo og pakitambag ang iyang mama kung naunsa iyang bugtong nga anak unya nakita nga si Boding dunay kakuwang sa kumpiyansa ug pagsalig sa kaugalingon kon insecure.

Unsa may mga timailhan sa insecure?

Numero 1 ang pagka close-minded. Di ni siya abri sa mga bag-ong kausaban o suhistiyon gikan sa uban kay para niya kahibaw siya sa tanan (know it all) unya kusog kaayo mo rason ug mo ipsot kung dunay ipabuhat nga trabaho para niya.

Magpunay ra sab kini og panaway sa agi uban apan kung naa gali siya’y mabuhat nga para niya insakto, hangol kini sa pagdayeg.

Magbuotbuot sab kini kung unsa ray iyang gustong buhaton kay di magpasugo o dikta. Unya kung ugaling masayop kusog kining mamasa sa sayop ngadto sa uban. Di kini sila kabalo mangayo og pasaylo.

Hadlukan sab morisgo og bag-ong trabaho. Talawan sab kining mosuway og laing assignment o responsibilidad kay kontento ra kini sa iyang naandang comfort zone.

Di sab kini ganahan mohalubilo sa ubang tawo apan gusto kanunay nga daygon. Pagbantay kay kusog sab ni silang manlibak.

Dali ra sab ni siya maka-husga sa uban apan conscious kung unsay ikasulti sa uban mahitungod niya. Unya kanunay sab nga negatibo ang hunahuna ini.

Kini sila daghang mga tinago-an unya maglisod og himo og kaugalingong desisyon.

Sa laing bahin, kadtong taas og kumpiyansa sa kaugalingon (confident), abri kanunay sa mga suhistiyon ug hunahuna sa uban. Andam sab kining makakat-on ug maminaw unya di dalo sa paghatag ug pagdayeg og komplemento.

Andam sab kining modawat sa mga kasaypanan ug kapildihan unya di ni niya ikauwaw iyang mga kakuwangan. Gani kung masayop, iya ra kining ikatawa. Positibo sab kini og panghunahuna og di manlibak.

Andam ug tagana kining morisgo, mohimo og desigyon sa kaugalingon og di mahadlok mosuway og bag-ong mga assignments o trabaho.