HUMAN nasugamak og dakong kapildihan sa pagsugod sa 2021 Chooks-to-go VisMin Cup, ang Alayon Zamboanga (Alza) nakahukom nga kuhaon og balik ang Sugboanong guard nga si Eliud “Eloy” Poligrates.
Sa online interview sa Superbalita Cebu, gikompirmar ni Poligrates nga gitawagan na siya sa management sa Alza aron pabalikon sa team.
Hinuon dili pa siya makapakita og aksyon sa ikaduhang duwa sa team nga gidumala ni coach Bong Abad, kanhi coach sa University of San Carlos Warriors sa Cesafi.
Giangkon ni Poligrates nga wala pa gyud siya sa saktong kondisyon sanglit naundang siya sa iyang ensayo sukad sa iyang pagpauli niya sa Sugbo.
Napugos si Poligrates sa pag-uli sa Sugbo sa wala pa sugdi ang Mindanao leg tungod sa personal nga rason.
“Ako silang giingnan nga wala pa ko sa kondisyon. Makaabag ra hinuon ko nila kung makalarga gyud ko,” matod pa sa lumad nga taga isla sa Camotes, kinsa kanhi most valuable player (MVP) sa D-League.
Si Poligrates, produkto sa Southwestern University (SWU) Cobras, nakaduwa usab sa Philippine Basketball Association (PBA) ubos sa Talk N Text, Air21 Express ug sa Kia Picanto nga mao na karon ang Terrafirma Dyip. (JBM)