GIBUTYAG sa Games and Amusements Board (GAB) nga gitugtan na sa Inter-Agency Task Force ang Philippine Basketball Association (PBA) nga makasugod sa ilang 46th season sulod ning buwan sa Hulyo, 2021.
Kini human nakighugpong ang kadagkuan sa PBA pinangulohan ni commissioner Willie Marcial sa IATF Technical Working Group niadtong Hulyo 8, 2021 aron ipresenta ang plano sa liga sa pagpadagan sa torreyo taliwala ning padayong hulga sa pandemya.
Ang PBA gilaumang mopagawas og opisyal nga pag-anunsyo kabahin sa resulta sa ilang pagpakighugpong sa IATF.
Apan basi sa pamahayag ni GAB chairman Baham Mitra atol sa press conference sa ilang ahensya kagahapon, Hulyo 9, 2021, gitugtan na sa IATF nga makasugod ang PBA sa bag-o nilang season karong Hulyo, 16, 2021.
“We are very happy that the PBA has been allowed to resume July 16,” matod ni Mitra nga napatik sa www.spin.ph.
Matod sa GAB nga plano sa PBA nga ipahigayon ang mga kombati sa 46th season sa Ynares Sports Arena sa Pasig City.
Gibutyag sab ni Mitra nga gitugtan na sab nga makabalik ang ubang professional leagues sa nasod sama sa Premier Volleyball League ug National Basketball League.
“Umpisa na po lahat. We are very happy na magre-resume na pero tuloy pa rin ang ingat,” pasabot ni Mitra. (ESL)