DUNAY 243 nga average sa gidaghanon sa mga aksidente sa mga sakyanan sa kadalnanan sa Dakbayan sa Sugbonga matag buwan.
Usa ra ka disgrasya sa kadalanan ang deperensiya sa average sa Cebu City sa unang unom ka buwan sa 2021 itandi sa susamang mga buwan sa 2020.
Base sa record sa Cebu City Transporation Office (CCTO), ang Cebu City nag-average og 243.16 ka vehicular accidents sa unang unom ka buwan sa 2021 samtang 242.16 ka disgrasya ang average sa unang unom ka buwan sa 2020 gikan sa Enero hangtod sa Hunyo.
Ang record sa CCTO nagtug-an nga niadtong katunga sa 2020, aduna silay natala nga 600 ka disgrasya sa Enero, Pebrero (421), Marso (280).
Samtang pagsugod sa pandemic dihang gipatuman ang lockdown, nikunhod kini sa 46 sa Abril, Mayo (40), ug 72 sa Hunyo kun 1,453 ka vehicular accidents.
Sa 2021 diin gìtugotan na ang pagdagan sa mga sakyanan ubos sa modified general community quarantine, nakalista sila og 205 para sa Enero, 246 sa Pebrero, 254 sa Marso, 230 sa Abril, 278 sa Mayo ug 240 sa Hunyo kun 1459 ka disgrasya.
Si Paul Gotiong, spokesperson sa CCTO, nagkanayon nga sagad sa mga disgrasya niresulta sa pagkadanyos sa ilang mga sakyanan ug motorsiklo.
Nangayo og dispensa si Gotiong sanglit wa silay record sa mga casualty ug kadtong naangol sa insidente sanglit anaa kini sa mga police stations diiin nahisakop ang lugar nga nahitaboan.
Pedestrian lane
Samtang giawhag sa CCTO ang publiko sa pagtahod sa pedestian lanes o crosswalk aron malikayan ang disgrasya.
Kon molabang man gani, adto moagi sa pedestrian lane.
Giawhag usab sa CCTO ang mga driver sa pagtahod sa pedestrian lane aron malikayan ang mga disgrasya. Gikan sa Enero hangtod sa Hunyo ning tuiga, ang CCTO nakadakop og 33,091 ka mga jaywalker sa kadalanan sa Dakbayan sa Sugbo.