MAKABATON na unya og luwas ug maayong mga pinuy-anan ang mga lumolupyo nga naa namuyo daplin sa kabaybayunan sa Siyudad sa Lapu-Lapu.
Si Lapu-Lapu City Mayor Junard “Ahong” Chan, sa iyang ikatulong State of the City Address (Soca) sa Huwebes sa gabii, Hulyo 8, 2021, nibutyag nga ang mag-unang beneficiary sa tukuron nga socialized housing sa Siyudad mao ang mga lumolupyo sa kabaybayunan nga temporaryo nilang gipabakwit tungod sa hulga sa dagkong mga bawod.
Ang Siyudad nakigtambayayong niini sa private sector aron di makagasto ang City Hall.
Ang motukod sa housing project nga pabarugon sa baybayon sa Barangay Canjulao mao ang Premium Mega Structure Incorporated.
“Niadto pang panahon ni President Gloria Arroyo gideklara ang maong dapit isip socialized housing site, pero sulod sa 18 ka tuig nga wala kini tagai og pagtagad sa kanhi namunoan sa dakbayan, ato kini karon gisubhan aron matagaan og katumanan ang dugay na nga gihandum sa atong mga kaigsuonang kabus nga taga dakbayan, ilabi na kadtong peligro nga nanimuyo daplin sa kabaybayonan,” matod ni Chan.
Ang proyekto tipik sa 203-hektaryang reclamation project nga tukoron sa Barangay Canjulao ug Punta Engaño nga gastuhan og labing minos P3 bilyunes.
Ang 25 hektarya nga housing project mobarog sa i-reclaim nga dapit sa baybayon sa Barangay Canjulao, diin kasamtangang gipapuyo ang mga lumolupyo nga apektado sa bagyo sayo ning tuiga.
Joint venture kini tali sa Siyudad sa Lapu-Lapu ug Mactan Blue Waters Development Consortium, kansang kasabutan gipirmahan ni Chan niadtong Agusto 7, 2021.
Pabarugon sa reclamation area ang usa ka business hub sa Siyudad nga maisip nga 'little Hong Kong' kon mahuman na ang katukoran sa proyekto ug duna nay high rise buildings nga mobarog.
“Gihikay na karon ang mga permits aron masugdan na ang pagtrabaho niini sa labing madaling panahon. Atong napanglantawan nga ang maong mixed-used reclamation project magdala og dakong revenue sa panudlanan sa atong dakbayan,” dugang sa mayor.
Ospital
Gipasigarbo usab ni Chan ang iyang paghuman sa first ug 2nd phase sa katukoran sa Lapu-Lapu City Hospital nga napahimudsan na sa mga Oponganon.
“DInay modagan pa sa mga pribadong ospital, daghan na karon ang gusto nga magpatambal sa atong tambalanan kay tungod nakita nila ang dakong kausaban niini, mapa-pasilidad man o serbisyo nga gidalit niini,” nagkanayon si Chan.
Gigahinan ang phase 3 og pundo sa Department of Health (DOH) 7, apan kay di kini igo sa paghuman, nangayo siya og dugang pundo kanila ni Senador Bong Go ug Sonny Angara.
Gawas niini, nag hire usab ang Siyudad og mga medical specialist nga motrabaho sa ospital aron mohatag og libreng serbisyo sa panglawas alang sa mga kabos.
Iya usab nga gipasigarbo ang Santa Rosa Hospital nga duna nay emergency room ug cadaver area. Nakapalit usab og mga ambulansya ang Siyudad nga gipangtugyan ngadto sa mga barangay.
Ubos sa Ahong Cares Bayanihan Project, matod ni Chan nga nakalusad kini og 71 ka road concreting project nga way gasto ang Siyudad.
Matod niya nga “tubag sa kanhi namuoan, ‘wala kitay mabuhat niana kay kana gipanag-iya sa pribado.’ Sayon ra nila pag-eskapo sa maong problema. Ang mga pobreng Oponganon, igo lang intawon sa pagdawat sa maong polpol nga rason,” matod ni Chan.
Matod niya, mokabat sa 20 kilometro nga karsada ang nasemento ning proyekto.
“Sa kinatibuk-an, aduna kitay 71 ka road concreting projects ubos sa Ahong Cares Bayanihan Project..." matod ni Chan.
Kuryente
Iya usab nga gipasigarbo nga ang isla sa Olango karon duna nay stable nga supply sa kuryente nga sud sa daghang katuigan, wa matagad.
Nasulbad kini pinaagi sa pagtukod sa Olango Power plant.
Mga lumolupyo sa mga isla sa Caubian, Caohagan ug Pangan-an nga wa maabot sa serbisyo sa Mactan Electric Company (Meco) gipahatdan niya og solar panel sets aron makasuga.
Samtang si Kongresista Radaza, sa iyang mubo ug opisyal nga pamahayag, nihulagway sa mga pasangi ni Chan nga mga bakak.
Tagsa-tagsaon unya kini niya sa pagtubag.
“While others spend every second of their life aggrandizing oneself, we take the high road by showing our trait of being a true Oponganon - we rise on our own merits and not by shamelessly building lies. We refuse to dignify cheap desperation marked by spending every moment of office term for politicking as if every day is election day... insults the intelligence of every Oponganon. Pero moabot ra ang saktong higayon para tubagon ang mga pagpangilad a katawhan,” matod ni Radaza. (GCM, REV)