Human sa hataas nga pag-antos, gihatagan na og pagtugot sa Inter Agency Task Force ang Philippine Basketball Association nga makasugod sa ilang 2021 season.
Ang PBA mosunod sa ilang set-up sa niaging tuig diin ilang ipatuman ang bubble set-up aron makontrolar ang lihok sa mga players gikan sa ilang balay, paingon sa venue ug vice versa.
Sugdan sa PBA ang ilang season karong Hulyo 16 diin adunay tulo ka duwa ang ipahigayon sa Ynares Sports Arena sa Pasig City nga sugdan kini sa simple nga seremonyas alaS 11 sa buntag ug isunod ang duwa alas 12:30 sa udto.
Para sa pagdali sa season, ang PBA nga gipanguhohan ni Commissioner Willie Marcial nihukom nga ipatuman ang tripleheaders para sa Philippine Cup gawas lang kon adunay 3x3 league nga duwa ug sama sa kaniadto nga wala pay pandemic, ang duwa ipahigayon sa mga adlaw nga Miyerkules, Biyernes, Sabado ug sa Dominggo sugdan ang duwa alas 2:30 na sa hapon.
Kay ang duwa adto sa Pasig City, sa pagkakaron, ang PBA naghuwat pa sa advice sa Department of Health ug sa Games and Amusement Board may labot sa pagpahigayon sa ilang practices sa Metro Manila.
Ang PBA mosunod sa ilang format sa niaging Philippine Cups nga adunay single round-robin tournament diin ang top eight teams mo-advance sa quarterfinals. Ang top two teams adunay twice-to-beat advantage batok sa laing unom ka teams.
Ang Philippine Cup gitinguha nga mahuman sa Oktubre samtang ang second conference ipahigayon pipila ka semana o buwan human sa championship.
Sa ilang second conference, ila karong gitan-aw ang posibilidad nga mokuha sila og mga import players apan posible sab nga mopahigayon sila og laing All Filipino conference apan niining higayona, ila nang iapil sa duwa ang Gilas Pilipinas isip guest team.
Sama sa naandan, walay mga fans nga tugotan nga makatan-aw sulod sa venue apan matod pa ni Marcial nga posible nga hinayhinayan nila og pasulod inig abot sa playoffs o sa second conference depende sa sitwasyon.
Ang PBA mopahigayon og RT-PCR test sa ilang mg players ug staff tulo ka adlaw sa dili pa ang opening ug isunod ang laing testing sa mosunod nga 10 ka adlaw bisan paman kon fully vaccinated na ang mga players. (PAC)