Ang Milwaukee Bucks nangita og paagi aron ilang mahatagan og igong suporta si Giannis Antetokounmpo aron suwayan og kibhang ang 0-2 nga alkanse batok sa nagkainit nga Phoenix Suns atol sa game 3 sa best of seven NBA Finals alas 8 sa buntag, Hulyo 12,2021.
Ang Bucks mo-host sa NBA Finals sa labing unang higayon human sa 50 ka tuig diin sila katapusang nakatilaw og NBA championship mosandig na usab sa ilang opensa ngadto sa ilang two time NBA MVP nga si Antetokounmpo, kinsa grabe ang perfromance nga gipakita human naangol ang iyang tuhod sa conference finals.
Ang gipangita sa Bucks mao ang kanhi performance sa ilang mga guard nga silang Jrue Holiday ug Khris Middleton kinsa nagsalimuang ang ilang opensa sa finals.
Ang Greek Freak nipaarak og 42 puntos ug 12 rebounds ug 3 blocks nga ilang gihisama nga 2021 version ni Willis Reed sa game 7 sa New York Knicks niadtong 1970’s diin gipugos niya ang injury bisan ang uban mopahuway unta ug padayon nga nipasulod sa iyang mga jumpshots samtang si Giannis way puas ang paghansak.
Bisan paman sa 20 points sa third quarter nga maoy labing taas sa playoff sa usa ka kwarter human ni Michael Jordan, kinsa nihipos og 22, si Holiday ug Middleton nagpabilin nga bugnaw ang opensa.
Human gipangulohan ni Middleton ang Bucks sa scoring sa game 1, nahagsa lang og kalit ang iyang shooting percentage sa game 2, kinsa nipasulod lang sa lima gikan sa 16 niya ka tira samtang si Holiday 7 for 21 sa kinatibuk-an apan si Giannis nisalig gihapon sa iyang mga kauban.
“Just keep talking to him, keep telling him to be aggressive,I know he’s going to be there when we need him the most and I don’t worry about it. He’s a great basketball player. He’s played great all year and he’s going to continue to play great for this team.” paghulaway ni Antetokounmpo ngadto kang Holiday.
Base sa mga tigpaniid, kon mapilde gihapon ang Bucks sa game 3, kini na maoy katapusan sa ilang season sanglit makasakay naman sa momentum ang Suns ni Chris Paul ug Devin Booker.
Masaligon si Giannis nga makuha ra og balik ni Holiday ang iyang kumpyansa sa game 3 human sa nagsalimuang nila nga opensa diin si Holiday igo lang nipasulod og 11 gikan sa iyang 35 ka attempts kun 31.4 percent sa unang duha ka duwa sa finals.
Samtang buot nga makabawos sa Bucks, ang Suns usab nagtinguha nga ilang matiwasan sa game 3 ang ilang kontra para sa mas hayag nga dalan paingon sa kampyonato sa NBA. (PAC)