Duha ka mga semana nga pork holiday gipatuman sa Dakbayan sa Ormoc gumikan sa pag-igo sa African Swine Fever (ASF).
Ang pork holiday gisugdan niadtong Hulyo 3 hangtod sa Hulyo 17, 2021 base sa giluwatan nga kamanduan ni Ormoc City Mayor Richard Gomez.
Natala sa Ormoc City ang unang kaso sa ASF sa Barangay Salvacion.
Moabot sa 136 ka mga baboy nga nasulod sa 500-meter radius gipamatay aron mapugngan ang pagkatap sa virus.
Dunay baktin nga napalit sa Salvacion nga kauban niadtong naigo sa ASF ug gidala sa Brgy. Labrador.
Gisubay sa City Veterinary Office (CVO) ang napalit nga baktin nga nadala sa Labrador.
Mihimo sila og rapid test ug gipadala sa Regional Animal Disease Diagnostic Laboratory (RADDL), diin 13 ka baboy ang nagpositibo sa ASF.
Dul-an sa 60 ka mga baboy ang gipamatay sa Labrador.
Pipila ka adlaw ang nakalabay, pipila ka baboy sa stockyard sa Ormoc City Slaughterhouse ang kalit nga nangamatay.
Gi-rapid test ang mga kauban nga baboy ug gikompirmar sa RADDL nga positibo sab sa ASF ang nahabilin nga mga baboy.
Niabot sa 100 kapin ka baboy sa ihawan ang gipamatay aron mapugngan ang pagkatap sa virus.
Matod ni Dr. Joseph Cortes, posible nga dunay usa ka baboy nga napalusot nga dunay ASF.
Tungod kay dili man mahurot og ihaw ang tanang mga baboy sa usa lang ka adlaw, nakatakod pa kini sa iyang mga kauban.
Matod ni Cortes, dunay selective ug non-selective depopulation sa mga baboy.
Sa selective depopulation, kitaon sa CVO kon ang mga baboy nga nasud sa 500-meter nakasunod ba sa biosecurity measures ug unsa kini kalay-a gikan sa baboy nga naigo sa ASF.
Sa non-selective depopulation, gipamatay ang tanan baboy, walay pili pili bisan nakasunod sa biosecurity.
Sa unang kaso sa Brgy. Salvacion, gi-apply sa CVO ang non-selective depopulation kay mao kini ang labing una o index case.
Pero sa Labrador ug Slaughterhouse, pulos na selective depopulation ang gipatuman kay dili kini ang pinakauna nga kaso kumpara sa Salvacion.
Matod ni Cortes, ila lang i-monitor ug i-surveillance ang mga baboy nga nasakop na sa 501 -1,000-meter radius ug mohimo og blood sampling hilabi na sa dunay makita nga sintomas.
Dapat dunay biosecurity measures ang mga baboyan, dugang niya.
Naay gitawag og indemnification ang Department of Agriculture diin matag baboy nga napatay, dunay ihatag nga P5,000 sa tag-iya.
Dapat na-insured ang mga binuhi nga baboy una pa niigo ang ASF sa Ormoc aron makaapil sa indemnification.
Apan kon magpa-insured kahuman naigo sa ASF ang Ormoc, dili na pwede.
Walay labot o dili apil sa indemnification ang mga baboy nga nag-totoy pa lang.
Si Gomez miluwat og Executive Order 186 pagpatuman og duha ka semana nga pork holiday sugod Hulyo 3 hantud Hulyo 17, 2021, aron mapugngan ang pagkatag sa virus.
Ang tanan nga mga karneng baboy nga ibaligya dapat giihaw sa Slaughterhouse.
Dili usab pwede magpagawas ug magpasulod og baboy ug karneng baboy gikan sa laing barangay.
Matod pa ni Cortes, nga kon ‘personal consumption’ o kamo ra sa inyong pamilya ang mokaon sa karneng baboy, pwede ra makaihaw sa hawanan, apan pasabta ang barangay officials aron ma-inspekyon ug masiguro nga wala kini gibaligya.
Base sa kamanduan, way baboy o karneng baboy ang ipasulod ug ipagawas sa kada barangay sud sa duha ka semana nga pork holiday.
Base sa pagsusi sa CVO, gikan kini sa Cebu ug ubang lugar nga way ASF nga gibiyahe pinaagi sa barko.
Giinspeksyon sa CVO meat inspectors ang mga meatshop ug dunay silay igo nga mga dokumento pagmatuod nga gikan sa Cebu o mga lugar nga way ASF ang gibaligya nga karne.
Para sa dugang pangutana, pwede bisitahon ang City Veterinary Office sa Brgy. Alegria, Ormoc City ug pwede motawag sa 0908-983-2285.