Malipayon ang produksyon sa Obra Cinema kay nakuha nila si Kim Chiu para sa pelikula nga “Bawal Lumabas.”
Kon nahinumduman, si Kim ang nagpasikat niini niadtong panahon sa pandemya, nabuhatan kini og kanta, series, ug karon pelikula.
Pero dili si Kim ang original choice niini kon dili ang Kapuso artist nga si Sanya Lopez. Okay na unta ang tanan pero sa dihang na klaro na ang shooting schedule ini sa Baguio dili pwede si Sanya.
Mao nga ang ending si Kim Chiu ang nahimong gipuli niini. Dali ra nga nahuman ang shooting nila sa Baguio.
Ang “Bawal Lumabas” usa ka horror trilogy film sa direksyon ni Adolf Alix Jr., diin ang mga bida sa matag episode silang Aiko Melendez, Beauty Gonzales, ug Kim Chiu.
Gisugdan na ang post production niini kay may plano nga i-submit kini isip entry para sa Metro Manila Film Festival kon aduna man karong tuiga.
Duna man guy mga hugon-hugon nga mahibalik na ang mga sinehan. Kon madayon man kini usa ko sa mahimong malipayon niini kay gimingaw na gyud ko sa mga sinehan.
Naghisgot man ta’g MMFF 2021 , may mga pipila ka pelikula ang gustong mahiapil dinhi.
Sama sa “Revirginized” ni Sharon Cuneta sa Viva Films ni Vic del Rosario, anaa pay pelikula ni Jun Lana sa Idea First Company “Sampung Mga Kerida.”
Plano usab ni Direk Joel Lamangan nga iapil ang iyahang “Ang Huling Baklang Birhen Sa Balat Ng Lupa” sa Heavens Best, may “Yorme” pa ni Direk Joven Tan ug uban pa.
Mabalik ta sa “Bawal Lumabas,” malipayon kaayo ang Kim Chiu nga nahiapil siya niini ug dili sab big deal kaniya kon second choice lang siya, Ay’g Saba!
* * *
Naukay gyud ang tanan sa dihang may migawas nga tsika nga human ni Bea Alonzo, si Anne Curtis na usab ang sunod nga mobalhin sa Kapuso network.
Nagsugod man gud kini sa dihang nag-zoom meeting ang Anne kauban ang mga executives sa Syete.
Unya sa dihang may nang-gawas nga report ug mga litrato naalarma sab tawn ang mga fans ni Anne.
Pero giklaro sab dayon ni Anne Curtis nga dili siya mobalhin. Nahimo lang ang maong meeting tungod kay gikuha kini sa GMA Films para sa usa ka movie project nga siya maoy bida.
Matod pa ni Anne nga sigurado gyud siya nga magpabiling Kapamilya ug mobalik pa siya sa noontime show nga “It’s Showtime,” Ay’g Saba!
* * *
Nakita na nako ang mga bag-ong picture ni Sarah Geronimo nga Muñoz na ang iyang buhok.
Para nako kon tinuod gyud kini angayan man sab kaayo ang Sarah ug mas nilutaw ang iyang kaanyag dinhi, siguradong mas mahalon siya sa iyang banang si Matteo Guidicelli, Ay’g Saba!