Diola: Bátà-bátà

Fr. Carmelo Diola

Binasi sa Amos 7:12-15; Salmo 85; Taga-Efeso 1:3-14; ug Marcos 6:7-13

Ang bantugang manunola sa “billiard” nga si Efren Reyes mao dayoy atong mahinumdoman kon makadungog kita sa angga nga “Bata.” Angayan ni siyang tawgog bata kay yano siya nga tawo ug mapaubsanon. Bata pod tan-awon ang nawong nga hingisi sama ni Efren. Dako kaayo siya nga garbo sa atong nasod.

Naa pod kitay pulong nga “bata-bata”. Mga tawo kini nga gasunodsunod sa usa ka gitawag og “bossing”. Masugosugo kini niya. Galamay sila sa ilang patron. Ang bossing pod ang bahala sa ilang mga panginahanglan. Mga sumusunod kini sila. Usahay maayo ang isugo, usahay dili pod.

Gihisgotan sa ebanghelyo ang laing matang sa pagkabatabata. “Ug gitawag niya ang Napulog-duha ug misugod siya pagpadala kanila sa tinagurha ug gihatagan niya silag gahom batok sa mga daotan nga espiritu.” Tinagurha kun “buddy system” aron adunay katabang ug adunay mosaksi sa kamatuoran sa mga panghitabo panahon sa panaw. Ang misyon nila mao ang pagpakigbatok sa mga daotang espiritu. Lisod kon mag-inusara.

Walay makalupig sa pagkahawod nga “bossing” ni Jesus. “Ug gipanghimangnoan niya sila sa dili pagdala bisan unsa sa ilang panaw gawas sa sungkod lamang, ni pan, ni puntil, ni salapi diha sa ilang bakos. Apan magsul-ob sila og sandalyas ug dili magsul-ob og duha ka kupo.” Gisiguro niya nga makaabot sila sa ilang destinasyon, mao nga padalhon sila og sungkod ug pasul-obon og sandalyas. Dili kinahanglan ang ubang mga butang kay inig-abot na nila sa ilang padulngan, ang mga lumulupyo didto maoy bahala nila.

Ang unang mga “bata-bata” ni propeta Amos mao ang iyang mga karnero isip ilang magbalantay. Nakalitan na lang siya nga usa ka adlaw niana gitawag siya sa Ginuo isip usa ka propeta. Sama sa nahitabo sa mga disipulo ni Jesus, gipabiya si Amos sa mga kadagkoan sa Israel sa iyang lugar nga gigikanan aron moadto sa Judah. Gidawat niya kini isip plano sa Dios.

Gipalagman pa gayod sa sulat ni Pablo ngadto sa mga taga-Efeso ang pagsabot mahitungod sa atong pagkabatabata sa Dios. Sa wala pa mamugna ang pundasyon sa kalibotan, gipili na kita sa Dios aron mahimong balaan. Gipili kita niya aron mahimong anak nga sinagop diha ni Cristo. Kining mga dagkong grasya gihatag sa Ginoo aron matuman ang iyang plano nga ang tanang kamugnaan mahiusa diha ni Cristo. Bata-bata diay sa Dios, sa dili matukib nga paagi, ang tanang katawhan, tibuok kalibotan ug kamugnaan.

Kang kinsa ka man nga bata-bata?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph