80M litro sa tubig ma-supply sa desalination plant ngadto sa MCWD

Dugang 80 milyones nga litro sa tubig ang ma-supply sa Metropolitan Cebu Water District (MCWD) sa mga konsumidor kon mahuman na ang mga water desalination plants.

Posible nga makompleto ang konstraksyon sa maong mga pasilidad sa 2022.

Bisan pa niini, dako pa kaayog kuwang ang supply sa tubig aron matubag ang kinatibuk-ang mga panginahanglan sa mga konsumidor.

Tinguha karon sa MCWD nga ilang maapas ang panginahanglan sa mga konsumidor sa tubig sa umaabot nga katuigan.

Si MCWD chairman of the Board Jose Daluz III niingon ang 80 ka milyones nga litro kun 80,000 cubic meters sa tubig maoy dugang sa 225 milyones nga litro kun 225,000 cubic meters sa tubig matag adlaw nga gi-supply sa MCWD ngadto sa mga konsumidor sa pagkakaron.

Kon madugang na ang 80 milyunes litro, moabot na og 305 milyunes litro matag adlaw ang ma supply sa MCWD.

Apan kay 540 milyunes man matag adlaw ang panginahanglan sa mga konsumidor sa water firm base sa statistics sa 2020, nagpasabot nga nagkinahanglan pa sila og 235 milyunes ka litro sa tubig matag adlaw.

“Hinay-hinayon lang nato’g abot ang water, at least every year naa ta’y source of water mapuno nato, additional supply of water, kay dako pa man sad ta’g buhaton,” matod ni Daluz.

Sugod lang niini ang partnership sa MCWD tali sa FDC Water Utilities Inc.

Ang MCWD nihatag ngadto sa FDC Water Utilities Inc., subsidiary sa Filinvest Development Corp. Utilities Inc., ang notice of award niadtong Hulyo 9, 2021 para sa unsolicited proposal niini sa pagbuhat og desalination plants sa dakbayan sa Sugbo, Lapu-Lapu, ug Talisay.

Si Daluz niingon nga human sa conferment sa notice of award sa FDC, mag-sumiter ang MCWD sa mga requirements ngadto sa Office of the Government Corporate Counsel (OGCC) para sa pag-review sa mga proseso kon nisunod ba kini sa National Economic and Development Authority (Neda) guidelines.

Kon aduna nay review ang OGCC, mosunod na dayon ang pag-award sa notice to proceed ngadto sa FDC.

Kon mahatag na ang notice to proceed, ang FDC makasugod na sa konstraksyon sa mga pasilidad nga target nila mahuman sa 2022.

Gisiguro sad ni Daluz nga dili mosaka og maayo ang presyo sa tubig sa MCWD. Ang pagsaka sad sa presyo, matod ni Daluz, kay inig 2024 pa ug bahinon og katulo ang increase.

Dili sad molapas sa 40 porsyento sa presyo sa tubig karon ang pagsaka. Anaa sa P152 ang 10 cubic meter, wa pay labot sa mga tax ug ubang charges. / pinaagi sa PR

Iproseso sa desalination facilities ang tubig sa dagat gamit ang High Recovery Seawater Desalination Technology pinaagi sa technical partner sa FDC, ang Hitachi Ltd., Japan.

Matod ni FDCUI chief executive officer ug president Juan Eugenio Roxas nga mao kini ang usa sa mga importante nga investment sa FDC tungod kay daghan ang makabenebisyo niini.

“The Filinvest Group’s entry into the sustainable water space is anchored on the company’s commitment to bring further significant socio-economic impact in the communities where it conducts its business,” matod ni Roxas.

“Our collaboration with MCWD promotes long-term solutions to the water requirements of Metro Cebu,” segun niya. (pinaagi sa PR)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph