SAMTANG nagkaduol na ang pag-file sa certificate of candidacy, subsob na ang kisaw sa politika sa atong palibot. Wala pa gani kampanya pero sa social media sugod na ang binanatay sa mga tawo nga nagtinguha pagdagan sa taas nga posisyon.
Sama kang Senador Manny Pacquiao, ang atong gitamod ug girespeto nga hero sa natad sa SPORTS nga boxing, pinaagi sa dungog ug tunog nga pangalan, iya kining gisakyan sa pamolitika ug nagmalampuson siya. Gikan sa pagka-congressman, gihatud siya sa mga katawhang Pilipino didto sa Senado.
Niadtong Agosto 26, 2015, umaabot ang filing sa certificate of candidacy sa national ug lokal eleksiyon, niadtong tungora sa mga press conference, matud pa ni Pacquiao "Kung ako ang mapili at manalo sa pagka-senador sa darating na eleksiyon, iwanan ko na ang pagbo-boxing at ipukos ko na ang panahon ko sa pagtrabaho bilang senador nang ating bansa."
Resulta, human siya midaug sa ikapito nga senador sa 12 nga nagpapili, nagpadayon siya sa iyang pagpamoksing, unang pagpamakak ni Pacquiao tungod kay sa rekord sa Senado matud pa ni retired Associate Justice Antonio Carpio, siya ang pinaka-absenos nga senador.
Ug iya pod ning giangkon, matud pa niya, "Yes I admit that. But not because I want too, but because I need too". Tungod daw sa iyang ka-busy sa pagpabuhat og mga balay sa mga pobre sa iyang PAKMAN subdivision.
Maayo ang iyang intensiyon, pero personal niya ni. Ang unang tulumanon ug katungdanan man god sa usa ka tawo nga nagpapili sa pagka-senador, motambong og session? Kay diha ka gisuweldohan gikan sa buhis sa mga katawhan.
Bantog ra diay nga wa kay kalibutan sa mga SENATE HEARING sa mga ahensiya sa gobyerno nga nahuman na'g imbestiga sa Senado kay ABSENOS man daw siya matud pa ni Senador Richard Gordon, chairman sa Senate Blue Ribbon Committee.
Dugang pa ni Gordon, gihimo lang ni Pacquiao nga SIDELINE ang pagka-senador niya ug didto siya nakatutok sa iyang personal interest.
Sama karon nga nagbulgar siya og kurapsiyon sa administrasyong Duterte, gilaliman ka triple pa daw kon itandi sa Aquino administrasyon?
Human niya'g tapok sa nagla-undok nga papeles kuno nga EBIDENSIYA, tua ningsibat sa America para sa iyang personal nga interest. Dapat tutokan ni Senador Pacquiao ug ipresenta niya ang gitapok niyang ebidensiya para tubagon pod sa mga ebidensiya sa mga ahensiya nga iyang gi-akusahan nga kurap.
Estilo sa pamolitika ni Pacquiao bulok, traditional politician (TRAPO) para mogawas siyang limpiyo, dauton ang iyang kaatbang sa politika.
Maningkamot gyud siya nga modaug sa iyang away kang Errol Spence Jr., para matunog na pod ang iyang pangalan nga para sa iya, ma-convert niya sa boto sa iyang pagdagan sa pagka- presidente, kay kaluoy sa Ginoo di man gyud tawon siya kuwalipikado kon educational background ang hisgutan.
Dapat unta gihunahuna daan ni Pacquiao nga kon boxing ang hisgutan, heavyweight ug champion siya. No weight si Presidente Duterte.
Pero sa POLITIKA, no weight ug amateur si Pacquiao. Ang iyang gikalaban, heavyweight champion ug undefeated si Presidente Digong.
So, atong hulaton ang insaktong panahon kon kaya ba niyang tumbahon si Mayor Inday Sara ning nagsingabot nga eleksiyon.