Dunay panultion nga nag-ingon, ang kalamposan nagsumikad sa walay paglurang nga paningkamot.
Ug isa sa mga ehemplo niini mao ang lab-aserang taga lungsod sa Medellin, amihanan sa lalawigan sa Sugbo nga si Luzviminda Sunit.
Si Sunit, nailang ‘Nanay Luz, napili nga usa sa mga Citi Microentrepreneur of the Year National Awardee, usa ka dakong dungog nga nakab-ot sa yanong lab-asera gikan nagsugod sa puhonan nga P4,000.
Samtang gilusad niadtong 2002, ang Citi Microentrepreneurship Awards (CMA) usa ka nasudnong pagpangita sa outstanding microentrepreneurs, kini giorganisar sa Bangko Sentral ng Pilipinas (BSP), Citi Philippines, ug Microfinance Council of the Philippines, Inc.
“Katong dili na bitaw mahalin nga isda gikan akong gisuroy, akong isulod sa planggana..,” matod ni Nanay Luz nga nagsugod sa pagka lab-asera niadtong 1975 ug wa mahalin iyang himuong buwad.
Ang iyang determinasyon, pagkamalaumon ug kompiyansa naghatag kaniya og lig-ong hinagiban ug ang iyang dakong tikang sa pagningkamot namugna tungod sa tbang sa First Agro-Industrial Rural Bank (FairBank) sa Dakbayan sa Bogo City, Sugbo nga nihatag niya og pautang aron paglapad sa negosyo.
Ang FairBank, nag-unang gitutokan ang pagtubag sa panginahanglan sa komunidad sa kalungsoran pinaagi sa pagtanyag og mga serbisyo sa banko alang sa micro, small ug medium enterprises (SMEs), usa ka affiliate sa City Savings Bank.
Ug sukad niadto, ang negosyo ni Nanay Luz misutoy sa paglambo ug ang iyang mga buwad mapalit na sa mga merkado publiko sa Medellin ug Bogo, lakip sa Leyte.
Karon duna na siyay 20 ka mga trabahante, lakip sa pipila nga gikan natangtang sa ilang unang trabaho tungod sa pandemiya.
Ang iyang kalamposan maoy dalan nga natuman ang iyang mga damgo sama sa pag-angkon og mga propriyedad ug pagpatuman sa pagtuon sa iyang mga anak.
“Tungod sa pandemic, amo ihatud diretso sa amo mga kustomer ang buwad aron mahalin ni,” diskarte ni Nanay Luz sa panahon sa kuwarentina.
Ang iyang pagpaningkamot nahimong inspirasyon sa uban human si Sunit, uban sa laing siyam ka Filipino gipasidunggan sa 18th Citi Microentrepreneurship Awards virtual ceremony niadtong Hunyo 15, 2021.
Garbo sa Visayas, si Sunit nidawat sa pasidungog gikan ni BSP governor Benjamin Diokno ug Citi Philippines chief executive officer Aftab Ahmed.
“We take this occasion to recognize our microentrepreneurs who, despite the odds, have shown great resourcefulness, courage, and resilience to flourish amid the Covid-19 pandemic,” matod ni Diokno.
Tambag ni Sunit sa ubang gagmayng negosyante sa pagpadayon sa pagbugtaw sa ilang mga damgo ug dunay mga tawo ug institusyon sama sa FairBank nga andam motabang kanimo.
“Ang ganahan magnegosyo atong tabangan ug tagaan nato og puhunan..” matod ni Nanay Luz.
“It is a distinct privilege for FairBank to have been a part of the success of CMA National Awardee Luzviminda Sunit in growing her microenterprise over the years. She was able to nurture a dried fish backyard venture into a prosperous trans-island operation,” matod ni FairBank president and CEO William Amado Castaño. (PR)