Ang alarma sa sunog maoy usa sa labing kutas nga coverage sa bisan kinsa nga reporter. Sa mga reporter sa radyo, mas bug-at ni nga gimbuhaton madako o gamay ang alarma. Mao ni subli nakong nasaksihan niadtong Miyerkules, Hulyo 7, sa hapon sa Sitio Romblon, Barangay Inayawan, dakbayan sa Sugbo.
Nagdilaab nga kayo ang nakapatarantar sa mga molupyo sa maong dapit. Usa sa mga reporter sa radyo nga akong nakit-an didto mao si Kasamang Paul Lauro sa RMN DYHP. Blow by blow coverage ang akong nabati gikan niya. Reporting nga way giliatan bisan ang buhagay sa tubig gikan sa fire hose nga nisirit sa iyang nahimutangan wa panumbalinga. Ang importante nga mahatid ang pinakauwahi nga kalambuan sa maong alarma.
Makamingaw ning trabahoa. Mao ni nisud sa akong hunahuna samtang nagsud-ong ko ni Paul. Bitaw, sa akong panahon hilabihang daghana ning alarmaha. Salamat nga wala makadako ang kayo. Lima ka balay ang naugdaw ug usa ang nakan-an. Way gireport nga napaso o nasamad.
Sa usa ka eskina nagkita mi sa laing higala. Hinumdum mo ni Marvin Dullo kadtong manuroyay og isda unya motukar sab kauban ang iyang banda diha sa mga tianggihan. Diay, sa maong sitio nagpuyo si Marvin. Gitultulan ko niya sa iyang gipuy-an. Di na layo sa mga balay nga naugdaw padung sa interior nga bahin. Nagsikit ang kabalayan didto.
Kon nakadako pa ang alarma, siguradong maapil og ksunog ang balay nga kasagaran hinimo lang sa light materials. Akong nahinabi ang ubang molupyo didto. Ilang giingon nga hilabihan gyud nga tumang kahadlok ang ilang gibati nga nagsud-ong sa kayo nga inanay nang nagpaduol sa ilang nahimutangan. Salamat sa kakugihan sa atong mga bombero. Gialarma og alas 4:10 sa hapon ug nakontrolar pagka alas 4:50 sa hapon.
Lain nga akong nadiskubrehan. Ang pinangitaay sa mga bata sa dihang niulbo ang kayo. Dili sama kaniadto nga kon ang sunog mahitabo sa oras sa tingklase, di kaayo hasol alang sa mga ginikanan kay tua man sa eskwelahan ang ilang mga anak. Gawas lang kon ang pananghid moeskwela apan tua sa kompyuteran nagwarawara.
Ang una nakong yawyaw sa alarma sa sunog mao tong gi-interview ko sa anchor sa usa ka sibyaanan sa panahon sa college. Dakong sunog sa Barangay Sambag 1 sa dakbayan sa Sugbo niadtong 1983, naghimo og coverage ang DYCB. Naatol nga nakabati ko sa ilang coverage nga naghisgot og mga boarding house nga naapil og kasunog. Sa usa kan-anan nga nag-monitor sa ilang coverage ko nakadungog. Mao tong nitawag ko sa ilang landline pagkahuman sa coverage.
Matod sa announcer nga si kanhi Vice Governor Nanding Celeste, limitado ra sa sunog kon unsa may akong tuyo. Ako siyang gisultian nga igo ra kong manawagan og tabang alang sa mga tinun-an nga biktima sa sunog. Gikulbaan ko nga nanubag sa iyang mga pangutana. Dili diay sayon ning inyerbyuhon ka sa radyo. Unya si Andoy Pordoy pa gyud ang nangutana. Dinhi napamatud-an kon unsa ka epektibo ang radyo.