Gitugotan na sa Inter-Agency Task Force for the Management of Emerging Infectious Diseases (IATF-MEID) nga makagawas sa mga balay ang mga bata nga labing minos singko anyos ug pataas sa mga lugar nga ubos sa general community quarantine (GCQ) ug modified GCQ.
Apan ubos sa IATF Resolution No. 125, ang kabataan nga singko anyos pataas limitado lang sa parks, playgrounds, beaches, biking ug hiking trails ug mga outdoor tourist attractions nga gitumbok sa Department of Tourism.
Di pa sila makasud sa shopping malls ug ubang mixed-use buildings ug facilities. Gitugotan silang makagawas sa balay, apan gidid-an sila sa pagsulod sa naasoy nga buildings nga gipaabot nga daghan ang mga tawo.
* * *
Sumala sa cnn.com, ang Pilipinas nakabakuna na sa 12.4 ka milyon ka doses sa bakuna batok sa Covid-19. Layo pa sa target sa gobyerno nga bakunahan ang labing minos 70 porsiyento sa populasyon nga gibana-banang niabot na sa 105 milyones aron makab-ot ang herd immunity.
Si Presidential Spokesperson Harry Roque namahayag nga ang mga lokal nga kagamhanan makabuot sa minimum age restriction sa ilang hurisdiksyon. Kon mao ni, di magpareho ang edad sa mga bata nga mahimong makagawas sa lain-laing mga lugar.
Morag naglikay sila nga mapareho ni sa ilang lagda nga kadtong mga tawo nga kompleto sa bakuna, mahimo na nga mobiyahe ug maglatas-latas sa lain-laing mga probinsya nga di na kinahanglan og negatibong resulta sa Covid-19.
* * *
Apan matod pa ni Roque, ang kabataan nga mogawas sa balay kinahanglan nga bantayan sa mga hamtong ug mosubay sa minimum public health protocols sa sa pagsul-ob og face mask ug physical distancing.
Kini ra bang mga bata nga mao pay paggawas sa balay human sa kapin sa usa ka tuig, morag mga kabayo nga nakagawas sa kuwadra. Mag-iniktin ug magdagan-dagan. Dugay ra ba kaayong maluya.
Wa diay makit-i sa IATF nga dugay nang nanggawas sa mga balay ang kabataan? Ang mahinungdanon nga di pasudlon ang kabataan sa mga lugar nga daghang tawo.