Usa sa argumento sa Kapitolyo alang sa pagpaluag sa atong health protocol sa mga Overseas Filipino Workers (OFW) ug kining Returning Overseas Filipinos (ROF) mao ang maayo nga pagkadumala sa lokal nga kahimtang sa Covid-19.
Apan karon, daw nahanaw kining maong argumento diha sa pagdeklarar sa Department of Health (DOH) nga naa na ang Central Visayas karon sa giingong third wave.
Sa miaging mga semana, nagsigi kitag dawat niining mga taho kabahin sa pagsaka sa mga kasong sa Covid-19 sa Bohol, Negros Oriental, ug gani naa nay mga kaso ang Siquijor. Apan giingong ubos ang pag-ihap dinhi sa Sugbo.
Sa miaging Hulyo 10, 2021, giangkon na sa Department of Health (DOH) nga apil sa maong pagsaka ang Sugbo.
Si Dr. Eugenia Mercedes Cañal, hepe sa DOH 7 Regional Epidemiology and Surveillance Unit (RSU), nagkanayon nga ang epidemic curve nagsaka sa miaging upat ka semana.
Sa miaging Biyernes (Hulyo 9, 2021), miabot og 564 ang bag-ong mga kaso sa Covid-19 dinhi sa Central Visayas. Tungod niini, naa nay 8,295 ka aktibong kaso sa rehiyon.
Ang labing daghang kaso nga 3,639 mao ang Negros Oriental. Gisundan kini sa Bohol nga dunay 2,244 ka kaso. Dinhi sa Sugbo, naay 1,005 ka kaso ang Syudad sa Sugbo, 701 sa lalawigan, 380 sa Syudad sa Lapu-lapu, 306 sa Syudad sa Mandaue, ug 20 sa Siquijor.
Mahimuot lang ko maghunahuna nga unang gibasol sa DOH mao ang mga bag-ong variant nga nakapahimong dali kaayo makatakod ang virus.
Apan nakahibawo man ang mga doktor nga kining wala ma-kontrol nga pagtakodtakod maoy makadali sa pagmugna og bag-ong mga variant. Dayon, ang di epektibong pagdumala sa kagamhanan apil sa nakaingon.
Pananglitan, gawas sa mga OFW ug ROF nga angay striktuhon sa pagbantay, huyang kaayo ang paglusot-lusot sa mga tawo gikan ug padung sa mga silingang lalawigan.
Kulang gihapon ang epektibong information drive aron magmatngon ang katawhan sa mga social ug health protocols. Mas mosalig pa ang atong kagamhanan sa police action. Nisamot ka kulang karon kay ang mga information drive kabahin na man sa kampanya sa eleksyon.
Ug mahibong ko sa atong lokal nga mga kagamhanan kay igo lang gyud maghulat sa bakuna gikan sa nasudnong kagamhanan. Walay paninguha nga makakuha og kaugalingong mga bakuna.
Sa akong pag-aninaw sa kahimtang karon, makaingon ko nga dunay dakong kahuyangan tuod ang nasudnong kagamhanan. Apan, ato sab gyud nga mabasol ang lokal nga liderato. (DM nako sa @anol_cebu)