SECTIONS
Superbalita Cebu
Tuesday, September 21, 2021
SUPERBALITA CEBU

Espinoza: Duterte-Duterte tandem na!

Nagpakabana

Klaro na kon kinsa ang kandidato pagka presidente sa administrasyon ni Presidente Digong Duterte sa piliay sa Mayo 9, 2022. Migawas na makadagan sa balita ingon man sa social media nga si Davao City Mayor Sara Duterte-Carpio, anak ni Presidente Duterte, desidido na modagan pagka presidente.

Ang mga kritiko ni Presidente Duterte ug sa iyang administrasyon wa makapugong sa ilang gibati. Grabe ang ilang pagsaway dihang mitug-an si Presidente Digong nga modagan pagka bise presidente bisan pa sa iyang gisulti kaniadto nga gikapoy na siya. Gani, moundang na unta siya pagka presidente kon ang iyang bise presidente si kanhi Sen. Bongbong Marcos pa.

Karon, daghan na ang nakahibawo sa istelo ni Presidente Duterte matag duna siyay isulti, nga saw-on dayon sa iyang tigpamaba nga si Sec. Harry Roque ug moingon nga nagkoedya ra ang Presidente. Sa ato pa, ang tanan nga iyang gisulti kaniadto pulos komedya. Gani, iya man gisulti nga mga estupido ang mga mituo sa iyang gipamulong atol sa 2016 nga kampanya nga mosakay siya og jetski ug iyang ibutang ang flag sa Pilipinas sa atong mga isla nga giangkon na sa Tsina.

Nagubot ug nabuak na ang PDP-Laban, ang partido ni Presidente Duterte, tungod kay ang pundok ni Energy Secretary Alfonso Cusi, PDP-Laban vice chairman, nagsuporta sa kandidato nga dili sakop sa partido. Tungod ani, gipalagbot sa PDP-Laban National Executive Committee (NEC) sila si Cusi, deputy secretary general Melvin Matibag, ug Astra Naik, membership committee. Sa miagi, nagplano si Cusi nga ipalagpot si Pacquiao tungod sa iyang komentaryo nga midaghan ang korapsyon sa administrasyon Duterte.

Ang PDP-Laban mao ang partido nga gimugna ni kanhi Sen. Nene Pimentel, amahan ni kaniadto Senate President Koko Pimentel. Karon, si Cusi na ang naghawod sa partido nga iyang gigamit pagtumod ug kunohay pagpugos kang Presidente Duterte nga modagan pagka bise presidente. Apan wala pa nila ginganlan kon kinsa ang ilang kandidato pagka presidente ubos sa PDP-Laban.

Apan karon nahibaw-an na ni Pimentel nga ang suportahan sa pundok ni Cusi nga kandidato pagka presidente mao si Davao City Mayor Sara Duterte-Carpio, nga maoy nangulo sa iyang partido Hugpong ng Pagbabago (HNP). Matod pa sa NEC nga ang pundok ni Cusi nakasupak sa batakang balaod sa PDP-Laban tungod kay ang ilang gisurportahan dili sakop sa partido.

Karon, di na malalis nga ang tandem sa anak ug amahan maoy modagan pagka presidente ug bise presidente. Si Sara Duterte-Carpio ang kandidata sa HNP pagka presidente ug si Presidente Duterte ang kandidato sa PDP-Laban pagka bise presidente. Kon ang social media basihan, mas daghan ang dili uyon sa ilang kandidatora. Apan ang pundok ni Cusi atat na atat na nga ituboy ang tandem ni Mayor Sara ug Presidente Duterte.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!