Ang Cebu City Government nagkuwang og mga doktor, vaccinators ug bakuna gumikan sa nagkadaghan nga vaccination sites nga ilang giablihan.
Si Konsehal Dave Tumulak, ang gitahasan ni Mayor Edgardo Labella sa pag-monitor sa vaccination rollout sa siyudad, nagkanayon nga napun-an na usab ang vaccination site human niabli sa Lunes sa buntag, Hulyo 12, 2021 sa ilang ganghaan ang Ayala Center Cebu.
Naa kini nahimutang sa south entrance, duol sa Uniqlo.
Ang management sa Ayala nibutang og doktor ug nurses nga maoy motabang sa vaccination rollout, apan aduna gihapoy personnel sa City Health nga mo-oversee sa operation.
Ang konsehal nagkanayon nga kini maoy labing bag-o nga vaccination site sa Cebu City ug ikatulong mall nga nitanyag sa ilang espasyo para mabakunahan ang mga Sugbuanon.
Sa kasamtangan, ang City Government adunay UC-Banilad, UC-Alcantara, Robinsons Galleria, SM Seaside City, Noah complex nga vaccination sites, wa pay labot sa mga bukirang barangay.
Si Konsehal Joel Garganera, deputy chief implementer sa Emergency Operations Center (EOC), nagkanayon nga adunay laing tanyag nga himuonon nga vaccination site nga nahimutang sa e-Block sa IT Park, apan wala pa kini moabli.
Ang pag-abli sa City Hall og daghang vaccination sites pinaagi sa pagpakigtambayayong sa dagkong mga mall mao ang ilang preparasyon sa higayon nga modagsa ang daghang doses sa bakuna gikan sa national government.
Si Tumulak nagkanayon nga inig ka hurot sa bakuna karong adlawa para sa first dose, wala na say magamit ang City Government alang sa vaccination rollout.
Maghuwat na usab sila sa supply gikan sa national government nga ipaagi sa Department of Health ug kuhaon sa Cebu City Health Department ubos sa pagpangulo ni Dr. Jeffrey Ibones.
Gihulagway sa konsehal nga dili sama sa una nga maglisod sila og kumbinse sa mga tawo nga magpabakona sanglit karon daghan na kaayo ang gusto sa vaccine.
BAKUNA MIABOT
Ang Central Visayas nakadawat og laing gigahin nga 62,200 doses sa AstraZeneca sa Dominggo, Hulyo 11, 2021, matod sa Visayas Vaccination Operations Center (VVOC).
Sa inadlaw nga daily briefing sa VVOC, si Dr. Mary Jean Loreche, spokesperson, niingon nga ang bag-ong nangabot nga doses sa AstraZeneca gidonar sa Japan.
Matod niya nga kini gamiton alang sa A1 priority subgroup (medical frontliners), A2 priority subgroup (senior citizens), A3 priority subgroup (persons with comorbidity) ug A4 priority subgroup (ubang frontliners).
Matod ni Loreche nga dugang mga bakuna ang mangabot ning buwana. (Dugang taho ni WBS)