Kapin sa usa ka libo ka armas ug explosibo nga nasakmit sa Police Regional Office 7 sulod lang sa usa ka buwan gipresentar ni Philippine National Police (PNP) Chief General Guillermo Eleazar isip pagpangandam sa nagsingabot nga eleksyon sa sunod tuig.
Lakip sa gipresentar ang illegal drugs.
Moabot na sa 1,160 ka mga loose firearms ug 13 ka eksplosibo nasakmit sa managlahing unit sa kapulisan sa Central Visayas sulod lang sa usa ka buwan nga operation.
Sa 451 ka operation, 158 ka mga suspek ang nangadakpan, lakip na niini ang duha nga nakalas human misukol sa mga pulis.
Gipakita usab sa PRO 7 ang ilang accomplishment sa gubat batok sa illegal nga drugas gikan sa Mayo hangtod Hunyo 2021.
Ang PRO 7 nakasakmit og 11,495.27 gramos kun 11 ka kilo kapin sa gituohang shabu nga adunay Dangerous Drugs Board (DDB) value nga P78,167,836 gikan sab sa Mayo ngadto sa Hunyo.
Nakakuha usab sila og 112,856.56 gramos sa punoan sa marijuana nga mo kantidad og P13,542,784.80.
Nakasikop usab silag 1,524 ka drug personalities, duha niini nangamatay, sa 1,147 ka anti drug operations.
Matod ni Eleazar nga ang pagkasakmit sa kapin sa mga armas kabahin sa pagpangandam sa nagsingabot nga national election sa mga armed groups nga posibling gamiton sa piniliay.
“Ito yung continuing effort nating ginagawa ngayon na malapit na ang election. Alam naman natin even kahit pa walang election, tuloy-tuloy naman itong ating trabahong ito kaya lang ngayon binabalikan natin itong sinasabi nating private armed groups na posibling nag o-operate o posibling mag operate para maiwasan natin ang karahasan sa darating na eleksyon,” matod ni Eleazar.
Samtang di pa mopatuman sa lahugay ang PNP organization ning nagkaduol na ang pag file sa certificate of candidacy sa mga magpapili sa umaabot nga eleksyon.
Pasabot ni Eleazar nga ilang timbang-timbangon kon angay ba nga ang usa ka personnel ibalhin sa laing lugar ilabi na kon adunay kabanay nga mokandidato sa dapit diin na destino ang maong pulis.
Estrikto siya sa iyang mando nga ang police dili mo kiling sa bisan kinsa nga politiko.
Kon aduna siyay makuha nga kasayuran batok sa iyang mga sakop, iya kining parelibuhan sa katungdanan.