SAMTANG nagkainit na ang politika sa atong nasud, daghang na sab ang buot pa-eskwelahon ilang mga anak sa kursong Bachelor of Arts in Political Science.
Kini human saba kaayo ang social media ug mainstream media sa kurso nga nahuman ni Senador Manny Pacquiao.
Si Pacquiao giayo og batikos sa mga dumadapig ni Pangulong Rodrigo Duterte tungod kay dali kaayo niyang nahuman ang kursong Political Science.
Sa ato na nga gihisgutan sa milabay nga semana, si Pacquiao mihuman sa maong kurso pinaagi sa giingon nga Expanded Tertiary Education Equivalency and Accreditation Program (ETEEAP) nga gitanyag University of Makati pinaagi sa pagbuligay sa Philippine Councilors League-Legislative Academy (PCLLA).
Kung legal ba ang degree ni Pacquiao nga gitanyag sa UMak ug PCLLA, ang bugtong makatubag niini mao ra ang Commission on Higher Education (Ched), mga mare ug pare.
Sanglit mao kini ang gisumsoman nga isyu sa bisan asa nga kanto, daghan ang nangutana nako kung maayo ba nga paeskwelahon ilang mga anak sa kurso nga Political Science.
Kay nangutana man sila, ako usab silang gitubag nga maayo ang maong kurso tungod kay mabansay pag-ayo ang mga bata sa nagkadaiyang political theories, political analysis, public administration, policy-making, international relations, local government code, constitutional law ug international law, politika ug panggobyerno sa nagkalain-laing nasud sa kalibutan, ug daghan pa.
Duna say nangutana kung unsa may maayong kaugmaon sa ilang mga anak kung mahuman sa kurso nga Political Science. Ug ako sab silang gitubag nga dunay maayong ugma ang ilang mga anak kung magtarong sa ilang pagtungha. Siyempre, kung di magtinarong sa pag-eskwela, di gyud makatrabaho.
Human nadungog ang akong tubag, duna say mga nangutana kung unsa akong masugyot nga barato ug dekalidad nga tunghaan. Sanglit nangutana man sila, ako sab silang gitubag nga mahimo silang mamili sa mga eskwelahan dinhi sa Davao, apan mas maayo ang University of Mindanao.
Tuod man, duna say nisagbat sa pagpangutana kung unsa nay kahimtang sa mga migraduwar sa maong kurso sa UM. Ug ako sab silang gitubag nga sa gihimong tracer study nga maoy ebidensiya atol sa Level IV Re-accreditation sa Pacucoa sa maong kurso, duna nay nahimong abogado, prosecutors, judges, ug empleyado sa judiciary department.
Ubang graduates nahimong politiko sama sa konsehal ug kapitan sa barangay, konsehal, bise mayor, mayor sa lungsod, board member, bise-gobernador ug gobernador, ug kongresista.
Gatusan sab ang nagtrabaho sa local government units (LGUs), national government agencies (NGAs), government-owned or controlled corporations (GOCCs), diplomatic offices abroad, PNP ug AFP.
Dugang pa, daghan sab ang nahimong executives sa pribadong kompaniya, academe, ug napili nga undersecretaries ug commissioners ni Pangulong Duterte.
Busa, maayo gyud ang kurso nga Political Science, mga Ga!