TAGUM CITY, Davao del Norte -- Tanggong sa prisohan ang tulo ka mga lalaki human wa mihunong sa checkpoint ang nag-drive sa motorsiklo nga ilang gidala alas 4 sa hapon niadtong Dominggo, Hulyo 11.
Sa report sa Police Regional Office (PRO)-Davao, nagpagukod sa mga pulis ang tulo ka mga lalaki, ug dihang na-korner na sila, gikapkapan ang drayber.
Sumala ni Police Major Joselito Tan Jr., sa Tagum City Police nga nailhan ang drayber nga si alyas Roldan, kinsa nakuhaan og usa ka Glock 17 Gen 4, caliber 9mm nga gipanag-iyahan sa Philippine National Police, duha ka mga magazines nga puno og 27 ka mga bala.
Dihang way mga legal nga dokumento nga mapakita ang suspek, gidakop kini ug ang iyang kaubanan.
Kasong paglapas sa Republic Act 10591 ang atubangon sa suspek didto sa korte.