Naglagiting nga P30 million ang kinatibuk-ang mabulsa nga insentibo sa Pinoy nga atleta nga makalangkat og gold medal sa umaabot nga Tokyo Olympics.
Kini human misaad ang presidente sa San Miguel Corp. nga si Ramon Ang nga mohatag siya’g dugang mga insentibo sa makahatag og medalya sa Pilipinas gikan sa prestihiyusong kompetisyon.
Matod ni Philippine Olympic Committee (POC) president Abraham “Bambol” Tolentino tupngan ni Ang ang naunang gisaad sa Manny V. Pangilinan Sports Foundation nga P10 million alang sa gold medalist, P5 million sa silver medalists, ug P2 million sa bronze medalists.
Mao sab kini nga kantidad ang madawat sa medal winners gikan sa gobiyerno basi sa Republic Act 10699.
Ang Pilipinas adunay 19 ka mga atleta nga mokombati sa Tokyo Olympics nga sugdan karong Hulyo 23, 2021. (ESL)