Migallen: Bucks nakakita na og formula batok Suns?

Human wa’y kaluoyng gidabodabohan sa Milwaukee Bucks sa Game Three ang Phoenix Suns, 120-100, mura og nabali na karon ang masyada sa mga sugarol.

Posibling ang odds sa Game Four sa Miyerkules (Huwebes sa Pilipinas) adto na mopabor sa Bucks kinsa naunhan og labok sa unang duha ka mga duwa sa series.

Kadtong mga pangagpas nga 4-0 or Suns in Four nga maoy mikatap og maayo sa The Valley Arizona, ibutang na lang to nila sa kalimot.

Ug sama sa naandan, ang star player sa Bucks nga Giannis Antetokounmpo mibida na usab human kini mipupo og 41 puntos, 13 ka rebounds ug unom ka assists sa Game 3.

Kini maoy ikaduhang sunodsunod nga higayon nga ang gitawag og “The Freak” nakapupo og sobra sa 40 puntos ug kapin sa 10 ka rebounds sa finals.

Sa kasaysayan sa NBA, siya maoy ikaduhang nakahimo niini, sunod ni Shaquille O’Neal.

Sa bisan asa nga departamento sa ilawom nga bahin, wa gyud kapugngi si Antetokounmpo ilabi na sa dihang na foul trouble ang sentro sa Suns nga si DeAndre Ayton sa sayong bahin.

Pero di kini mahimo ni Giannis kon wa pa siya makakuha og igong suporta gikan sa iyang mga kauban ilabi na nila ni Khris Middleton ug Jrue Holiday.

Si Middleton, kinsa mipabuhagay og 29 puntos sa Game One apan 11 puntos ray nahimo sa Game Two, mitali og 18 puntos, unom ka assists ug pito ka rebounds.

Si Holiday nga wa gyuy ayong gipakita sa unang duha ka duwa sa series, nakigduyog na sa opensa sa Bucks ug mitapos sa duwa nga may 21 puntos, siyam ka assists ug lima rebounds.

Sa duha ka kapildihan sa Bucks, kini sila maoy gibasol, ug gihagit sa fans nga mopakita sa ilang kalantip ug kahanas aron pagsuporta ni Giannis. Tuod man daw og sa ila kining gidawat.

Apan ang dakong rason kon nganong nakapakita og sakong dominasyon ang Bucks sa Game Three tungod sa ilang adjustment nga maka-create og saktong space pinaagi sa ilang ball movement - butang nga ilang nalimtan sa unang duha ka mga duwa.

Tungod niini, nabahin ang pag-ataki sa Bucks nga maoy nakapahatag og kalisod sa depensa sa Suns.

Samtang si Giannis ang momaniubra sa ilawom, sila usab si Bobby Portis nga may 11 puntos ug Pat Connaughton ang motimang nila ni Holiday ug Middleton sa gawas nga bahin.

Kon mao gihapon ni ilang buhaton sa Game Four o kaha sa tibuok series, dili halayo ang posibilidad nga silay ikalimang team sa kasaysayan sa NBA nga nakabangon human mabiya-i og 0-2 sa NBA Finals.

Turno na usab sa Suns nga mo-adjust atubangan sa alingogngog nga mga dumadapig sa Bucks.

Kon wa kaayo makabuylo si Chris Paul ilabi na sa pagkaguba sa ilang pick-and-roll ni Ayton, samot na si Devin Booker kinsa mirehistro lang og 10 puntos sulod sa 29 minutos tungod sa depensa sa Bucks.

Sa Game Three daw og sa nakakita na og epektibong formula si Bucks headcoach Mike Budonholzer kon unsaon pagpasawop ang Suns, pero remained to be seen kon kini makalahutay ba. Well see. (jun.migallen22@gmail.com)