Base sa Commission on Audit (COA) Annual Audit Report sa Dakbayan sa Sugbo, si Mayor Edgardo Labella nikuha sa labing taas nga grado sa tuig 2020, ang unmodified opinion (OP).
Sunod nga grado niini mao ang qualified opinion (QO) ug labing ubos mao ang adverse opinion (AO).
Sa pamunoan ni kanhi Cebu City mayor Tomas Osmeña, anaa lang sa QO ug AO kang kanhi Cebu City mayor Mike Rama.
Sa ato pa, maayo ang paggasto sa pamunoan ni Labella human ang kuwarta sa siyudad way kuwestyonabli.
MAGKONGRESISTA
Daghang pangan nga mitumaw nga magpapili sa pagka kongresista sa Sugbo karong Mayo 9, 2022 elections.
Usa niini si Atty. Totol Batuhan nga, matod pa, diha moplastada sa Cebu City South District ni last term Congressman Bebot Abellanosa.
Kon modayon og dagan si Batuhan, ug kon mapili, dunay klaromg tingog ang Cebu City didto sa Kongreso.
Maayong materyal si Batuhan kay wa man maduhig ang pangan sa mga nagkadaiyang kontrobersiya sa paghupot ug katungdanan isip under secretary ni kanhi Presidente Noynoy Aquino.
Nakaserbisyu sab kini sa pamunoan ni kanhi Presidente Joseph Estrada ug karon sa administration ni Presidente Duterte.
Nakakuha kog report nga magpapili sab sa pagka kongresista sa ikaduhang distrito sa Lalawigan sa Sugbo si Provincial Board Member Jose Marie Salvador.
Si Salvador maoy mopuli ni incumbent Congressman Willy Caminero nga anaa sa katapusang termino.
Si Salvador naila nga “Mr. Himsog” tungod sa adbokasiya niini sa ka himsog sa panglawas sa katawhan ang gitagaan ug prayoridad
Gipatuman ni Salvador ang health program sa ikaduhang distrito nga gisuportaan ni Cebu Governor Gwen Garcia.
Bisan di kaalyado sa pulitika ni Garcia ang rehistradong nurse sa Amerika nga si Salvador, pareho silag prinsipyo ug kakugi para sa katawhan sa gobernador.
Samtang, gihugonhugonan nga magpapili sa pagka bise mayor o kongresista sa north district si Cebu City Councilor Raymond Garcia.