SUPERBALITA DAVAO

Delos Reyes: May isyu kang Mayor Duterte-Carpio?

Yanong Pagsabot

MAAYONG adlaw na sab mga Super Suki!

Migitib na ang bidlisiw nga nagadala'g kahayag sa mga nagapaabot sa kabag-ohan sa desisyon ni Mayor Sara Duterte-Carpio nga unta modagan siya sa umaabot nga Presidential Election sa 2022.

Mikuyanap na ang balita nga abli ang desisyon ni Mayor Sara alang sa nasudnong lahugay sa politika.

Ang nahimong babag lang nga makausab sa iyang desisyon, kana kon mopadayon si President Rody Duterte pagkandidato pagka-bise presidente.

Kon mahitabo ang gipamulong ni President Digong, mas pilion kuno ni Mayor Sara nga magpa-reelect na lang pagka mayor sa dakbayan sa Davao.

Sa maong mga pulong, tataw nga ginakonsidera na ni Mayor Sara ug ginapangandaman ang posibilidad nga dawaton ang mga hagit sa kapanahonan.

Sa bag-ohay nga resulta sa survey sa Pulse Asia, nag-una gihapon si Mayor Sara sa nagustohan sa katawhan nga maoy sunod nga mangulo sa nasud puli sa iyang amahan.

Sa unom ka mga pangalan nga gipresenta sa katawhan, mikuha og 28 porsiyento si Mayor Sara Duterte Carpio, 14 porsiyento kang Mayor Isko Moreno, 13 porsiyento kang kanhi Senador Bongbong Marcos, 10 porsiyento kang Senador Grace Poe, 8 porsiyento kang Senador Manny Pacquiao, 6 porsiyento kang Leni Robredo ug 4 porsiyento ang nipabor kang Senador Panfilo Lacson.

Ang nagapabilin lang nga supak nga modagan si Mayor Sara mao ang iyang amahan kay dili kuno siya gusto nga masugamak sa iyang anak ang taras sa mga oposisyon labi na kang kanhi Senador Antonio Trillanes IV nga magpunay lang pagpangita og isyu sa pamilyang Duterte ug sa iyang mga kaalyado kaysa motabang alang sa pagpalambo sa nasud.

Halos tanang mga pangalan nga gihugon-hugon nga modagan pagka-presidente duna nay mga taras ug negatibo nga mga rekord sa katilingban. Nabutyag na sa katawhan ang ilang mga batasan ug tungod sa politika gihinay-hinay na sab pagbutyag ang mga sekreto nga ilang mga tinagoan.

Si Mayor Sara dugay ra gihandom sa katawhan nga mo-level up sa natad sa politika apan nagpabilin siyang mayor sa dakbayan sa Davao bisan iyang gipangunahan pagpangampanya ang mga kandidato pagka-senador niadtong mid-term electìons ug mipadaug sa daghan kanila.

Dili sala ni Mayor Sara nga usa siya ka Duterte diin ang iyang amahan ginaakusahan sa mga kontra sa politika nga usa ka malapason sa katungod sa katawhan tungod sa iyang maisugon ug duguon nga kampanya kontra sa druga.

Sa laing bahin, daghan ang miangay sa kalamboan nga iyang gihatud gikan sa Luzon, Visayas ug Mindanao aron walay mabilin sa paglambo sa nasud, dili sama sa milabay nga mga administrasyon nga giuna ang Luzon ug gikalimtan ang Mindanao.

Unsay isyu kang Mayor Sara?

Walay piho nga isyu nga puwedeng gamiton sa iyang mga kaatbang ugaling madayon ang iyang pagdagan kay limpyo ang iyang pangalan ug naay iyang kaugalingonng baruganan nga dili magpapiog bisan pa sa iyang kaugalingon nga amahan.

Ang paningkamot sa PDP-Laban Cusi faction pag-indosar kang Mayor Sara nahimong dakong isyu sa partido nga gidesisyon ni Senador Manny Pacquiao (party president) nga wagtangon sila sa partido tungod kay si Mayor Sara dili kuno sakop sa partido usa ka sayop nga akusasyon.

Ang Hugpong ng Pagbabago ni Mayor Sara, usa ka regional political nga partido apan si Mayor Sara sakop sa PDP-Laban sa iyang mga gisumite nga certificate of candidacy pagka-mayor sa dakbayan sa Davao.

Si Pacman mitapon lang sa PDP-Laban ug gipili nga presidente sa partido apan dili siya sakop sa panahon sa iyang pagdagan pagka-senador sumala pa kang Cusi.

Kahinumdoman nga sa unang pagdagan ni Pacquiao pagka- senador ubos siya sa United Nationalist Alliance (UNA) nga gidumala ni kanhi Vice President Jejomar Binay.

Mahinamon nga nagapaabot ang katawhan sa bulan sa Oktubre diin mahitabo ang pagsumite sa mga kandidato sa ilang mga CoCs sa buhatan sa Commission on Election (Comelec) samtang nagakakusog ang panawagan kang Mayor Sara nga "Run, Sara, Run."


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph