Nailhan na sa Mabolo Police Station ang nitulis ug nipusil patay sa usa ka construction worker sa dalan A. Soriano, Barangay Carreta, Siyudad sa Sugbo, alas 7:40 sa Martes sa gabii, Hulyo 13, 2021.
Ang construction worker giila nga si Jenrey Blanco Sanico, 25, nagpuyo sa Ponce 2, Barangay Carreta, apan lumad nga taga Siargao, Surigao del Norte.
Matod ni Police Lieutenant Colonel Wilbert Parilla, deputy city director for operations sa Cebu City Police Office, nga nagsabot si Sanico sa iyang uyab nga magkita sa kilid sa karaang White Gold Club tungod kay aduna silay lakaw.
Natingala ang girlfriend nga wala na makatubag sa iyang text ug wala usab makatubag sa iyang tawag hinungdan nga iya nalang giadto sa dapit diin sila mag-abot.
Dako nalang ang iyang kakurat nga nag buy-od na si Sanico nga patay na kay gipusil.
Nailhan sa mga saksi ang tulisan nga giingong notado na sa Barangay Carreta nga si Louie Arroja, hingkod.
Nakakita usab ang mga tawo nga gikuha ni Arroja ang cellular phone ni Sanico una nisibat.
“Based on the witnesses’ account sa gi-conduct nga investigation sa atong personnel sa station 4 (Mabolo), they found out nga the possible motive is robbery kay nawala sad ang iyahang cellphone and other belonging,” matod ni Parilla.
Gidugang ni Parilla nga ang maong dapit ngitngit.
Gani nagbutang og mobile patrol ang Mabolo Police Station sa maong lugar apan sa maong hitabo, naatol nga miuli sa station ang gi assign nga personnel alang sa pag relibo na niini.
“Naa na nay gibutang nga mobile diha, and that time is relieving time that is mga almost 15 minutes before 8 pm na siya nahitabo. Niuli sa station ang personnel para mokuha sa relibo so mao sad pagka hitabo sa insidente,” matod ni Parilla.
Tungod kay nailhan si Arroja, nimando usab si Parilla alang sa manhunt operation.