Nisugyot si Labor Secretary Silvestre Bello III nga wad-on na ang Bar exams ug mga board exams sa mga propesyon. Gikwestyon niya nganong moagi pa sa Bar exams ug mga board exams ang mga gradwado nga niagi na sa daghang mga examinations sa mga eskuyahan nga accredited sa Commission on Higher Education (ChEd).
Si Bello, usa ka abogado, gradwado sa Ateneo de Manila University ug nakahupot na og taas nga mga posisyon sa wa pa siya mahimong Secretary of Labor. Usa siya ka kanhi Justice secretary, solicitor general, Cabinet secretary ug kongresista isip representante sa 1-BAP party-list sa 16th Congress.
Tinuod, moagi gyud sa daghang mga examinations sa di pa mogradwar ang estudyante sa usa ka kurso. Dunay kurso nga upat ra ka tuig, dunay moabot og walo ka tuig sama sa medicine ug law kay moagi pa sa upat ka tuig nga kurso sa pre-med ug pre-law.
Daghang malipay kon wa nay Bar exams ug wa nay mga board exams. Matod pa ni Bello paningkamotan niya kini kon mahibalik siya sa Kongreso. Apan ari ta motutok sa bar exams, ang gibaniog nga labing lisod sa tanang mga examinations nga gihatag sa gobyerno. Mahimo kaha nga wagtangon ang Bar exams?
Si Chief Justice Alexander Gesmundo niingon nga nirespeto siya sa opinyon ni Bello, apan gisalindot niya ang pag-abolish sa Bar exams alang sa gustong mag-abogado. Matod sa pamunong mahistrado, ang mga abogado sa Pilipinas kinahanglang mopasar sa Bar exams kay ang maong propesyon “vested with public interest.”
Matod pa ni Gesmundo ang Rules of Court naglatid nga “mandatory” ang pagpasar sa Bar exams alang niadtong mag-abogado, ug hangtod nga anaa pa kini sa lagda, kinahanglan kining tumanon. Ang Rule 138, Revised Rules of Court, naglatid sa mga rikisito alang sa “admission to the Bar and who may practice law.”
Apan unsa ang mahitabo kon mahibalik si Bello sa Kongreso ug molampos ang iyang tinguha sa pagpasar og balaod nga magwagtang sa Bar exams ug mga board exams?
Usa sa mga gahom sa Korte Suprema ubos sa Section 5(5), Article VIII (Judicial Department), 1987 Constitution, nagkanayon, “Promulgate rules concerning the protection and enforcement of constitutional rights, pleading, practice, and procedure in all courts, the admission to the practice of law, the integrated bar, and legal assistance to the underprivileged.”
Ang Kongreso nipasar kaniadto sa Republic Act No. 972, ang gitawag nga Bar Flunkers Act, nga magpapasar unta sa nangahagbong sa Bar exams gikan sa 1946 hangtod sa 1953. Sa 12,239 nga nikuha sa Bar exams, 5,421 ang nakapasar ug 1,168 ang nangahagbong nga makabenepisyo unta sa maong balaod. Apan gideklarar sa Korte Suprema nga unconstitutional ang maong balaod. Matod pa sa Labawng Hukmanan, nisobra ang Kongreso sa ilang gahom.
Kuli nga mahitabo ang sugyot ni Bello. Sa kasamtangan, si Associate Justice Marvic Leonen, ang chairman sa 2020-21 Bar exams, nipasalig sa mga law graduates nga madayon ang Bar exams karong tuiga. Ug tungod sa Covid-19 pandemic, ipahigayon kini sa 16 ka testing centers sa laing-laing lugar sa Pilipinas aron ang mga bar candidates di na moadto sa Manila.