Nakaplagan sa state auditors nga dunay 632 ka beneficiaries gikan sa Cebu City nga di angay makadawat, apan nalakip sa Social Amelioration Program (SAP) nga sa kinatibuk-an, nakadawat og P3.79 million cash.
Ang Commission on Audit (COA), sa iyang 2020 audit report, niingon nga dunay recipients sa SAP, sagad mga benepisaryo sa Pantawid Pamilyang Pilipino Program, overseas Filipino workers, o beneficiaries sa programa sa Social Security System ug Department of Labor and Employment, nga niuli sa cash nga ilang nadawat kay di sila kwalipikado.
Apan duna gihapoy 632 ka ineligible beneficiaries nga wa mouli sa kwarta.
Nakaplagan sa COA nga ang nalambigit nga mga tawo nagtrabaho sa mga barangay o sa local government unit sa Cebu City.
Matag SAP beneficiary nakadawat og P6,000.
Matod sa COA nga ubos sa guidelines, ang elected ug tinudlo nga government officials o personnel sa bisan unsang national government agency, Government-Owned and Controlled Corporation (GOCC), LGUs, ug GOCCs nga dunay original charter, way apil sa Emergency Subsidy Program (ESP).
Ang COA nirekomendar sa Cebu City Government nga ang special disbursing officer ug City Social Welfare and Development Officer (CSWDO) mopadala og demand letters ngadto sa 632 ka individuals alang sa refund.
Ang COA nirekomendar usab ngadto sa City Legal Office sa pagpahigayon og imbestigasyon alang sa administrative, civil, ug criminal actions, kon gikinahanglan.