Trese ka adlaw sukad nibalik og trabaho si Cebu City Mayor Edgardo Labella human sa iyang medical leave sud sa tulo ka semana, nag-medical leave napud siya sugod sa Miyerkules, Hulyo 14, hangtod sa Biyernes, Hulyo 16, 2021.
Gibutyag ni ni Cebu City Administrator Floro Casas Jr. sa press conference sa Miyerkules nga naa sa hospital si Labella.
Matod ni Casas, si Labella na-admit sa usa sa mga tambalanan sa dakbayan niadtong Martes sa gabii, Hulyo 13, tungod sa sagunsun nga ubo.
Matod sad ni Casas nga magpa-ckeck ang mayor para sa posibleng pneumonia, apan di pa ni kompirmado.
Gisiguro ni Casas nga “okay” ra ang mayor.
“Atong issue karon ang iya gyung ubo, but Mayor is okay,” matod ni Casas.
“No need to worry,” segun sa abogado.
Matod ni Casas nga gipili nga magpaospital ang mayor karon tungod na sab sa iyang edad.
Mao na kini ang ikaupat nga medical leave ni Labella karong tuiga.
Una nga nag-leave si Labella niadtong Enero tungod sa iyang ear infection.
Nag-leave siya og tulo ka adlaw niadtong Mayo 31 human ma-ospital tungod sa “slight pneumonia.”
Niadtong Hunyo 9-30, nag-leave siya para maka-fully recover gikan sa sepsis.
Gipahibawo ni Labella nga nag-ungaw sa kakuyaw ang iyang kinabuhi sa sepsis, apan iya ra kining nalabang.
Sa tulo ka semana niyang leave, si Bise Mayor Michael Rama ang acting mayor.