MILUTAW nga si Mayor Sara Duterte-Carpio sa Siyudad sa Davao maoy nanguna isip pinakakugihan nga lokal nga ehekutibo sa tibuok Pilipinas base sa pinakabag-ong survey nga nakakuha og 93 porsiyento nga "job approval rating."
Ang survey gihimo sa RP-Mission and Development Foundation Inc. (RP-MD) nga nagbase sa nahipos nga mga datus gikan sa mga rehiyon niadtong Hunyo 2021 uban sa 5,000 ka respondente ug gianalisar sa grupo.
Nanguna si Duterte-Carpio sa listahan sa "Job Approval Rating of City Mayor/Per Regional Center" uban sa pangutana nga "Do you approve or disapprove of the way [pangalana sa mayor] is handling his/her job as City Mayor?"
Ang mayor sa siyudad gisundan ni Mayor Justin Marc Chipeco sa Calamba City uban sa 82 porsiyento, Mayor Arnan Panaligan sa Calapan City (77 porsiyento), Mayor Oscar Moreno sa Cagayan de Oro City (74 porsiyento), ug Mayor Benjamin Magalong sa Baguio City (71 poriyento).
Samtang si Cebu Governor Gwendolyn Garcia nakakuha og 77 porsiyento nga approval gikakn sa iyang mga konstiyuwents, nga naghimo kaniya nga nangunang gobernador sa nasud base sa survey.
Sa National Capital Region (NCR), si Quezon City Mayor Josefina "Joy" Belmonte maoy nakadawat sa pinakataas 0ga "approval rating" sa tanang mga mayor sa Metro Manila nga dunay 87 porsiyeno.
Sumala ni Dr. Paul Martinez sa RP-MD, ang tumong sa survey mao ang pagpahibawo sa mga lokal nga ehekutibo sa ilang kakugi sa paghatud sa ilang serbisyo sa publiko.
Nasayran nga base sa ilang pinakaulahing rekord, nalabwan pa ni Duterte-Carpio ang ratings sa iyang amahan, President Rodrigo Duterte nga 86 porsiyento niadtong Enero 2010, sa dihang siya pa ang mayor sa siyudad.
Dugang ni Martinez nga sa dihang gipangutana ang mga respondents kon unsa ang naa sa ilang hunahuna bahin sa anak sa presidente, matud pa nila nga ang mayor "strong willed, trustworthy, young and experienced official."
Hinuon wala pay pahayag si Duterte-Carpio bahin sa bag-ohay lang nga survey.