Saludo kami: pagdalit sa grasya

USA lamang ang iyang tumong ug tinguha — ang mapadalit ang grasya ug iyang makita ang tumang kalipay ug pahiyom sa mga nadalitan, gumikan alang niya, usa kini ka dakong katagbawan sa iyang kasingkasing nga iyang mabati ang walay kinutuban nga pagmaya diha sa pagpaambit sa grasya.

Siya si CJ Conde, usa sa mga batan-ong negusyante sa Dakbayan sa Davao, mangunay sa pagpaningkamot sa iyang mga negusyo, diin ang usa sa iyang mga takna, iya kining gihatag nga higayon aron dalhan og mga pagkaon, tambal ug mga serbisyo ang katawhan nga anaa sa hilit ug lagyong barangay sa Davao City.

Diha sa’y mga adlaw nga molibot siya sa mga checkpoints sa Davao City ug mga borders sa siyudad sa pagpang-apud-apod og mga grasya.

“Even before sa pandemic, panata na gyod nako ang mopahigayon og mga outreach program. Lami kaayo paminawon diha sa kasingkasing nga nakadalit ka, nakatabang ka, ug nakahatag ka... lami kaayong tan-awon ang ilang mga pahiyom... nahimo na nako kining ‘panata’ nga diha sa usa ka higayon mosaka gyod ko’g bukid uban sa akong mga higala, manghatag ta og mga makaon nila... gawas ana, naay mga tambal, mga bugas, pagkaon ug mga magamit sa mga bata diha sa ilang pag-eskwela ug mga basic services diha sa community,” ingon ni CJ.

Gawas niini, sa umaabot sab nga mga adlaw, modalit siya og "Operation Libreng Tuli," diin ang maong serbisyo iya kining dalhon sa iyang natawhang probinsya sa Davao Oriental.

Luyo niining pandemya, daghan ang nanginahanglan ug daghan ang nagpakita sa ilang kabayanihan, dili lamang mga medical frontliners apan lakip usab kining mga pribadong mga indibiduwal nga nagpakita sa ilang kadasig aron mapaabot ang grasya ug pagtabang.

“Mas moabot-abot pa ang grasya labi na kung imoha kining i-share sa uban nga nanginahanglan gayod, labi na karon nga pandemic, ang tanang diha sa kabukiran malipay gayod kung naay moabot sa ilang dapit nga modalit og mga grasya — sa gamay nga butang, dako na kaayo kini nga kalipay nila,” dugang niya.

Nagpasalamat sab si CJ sa walay-puas nga suporta sa iyang mga kahigalaan nga sa kanunay naa sa iyang kiliran nga miuban sa iyang kawsa ngadto sa kabukiran.

Bisan sa wala pa ang pandemya, wala igsapayan ni CJ ang kakapoy sa pagsaka sa bukid, uban sa kadasig nga makit-an niya ang mga bata diha sa ilang mga pahiyom nga maoy usa sa mga nahimo niyang inspirasyon.

Sa sama niini nga paagi sa usa ka tawo, ang panahon ug ang Kahitas-an ang mag-igo sa mga panalangin... nga ugma damlag, mas maghinobra pa, aron sa ingon mas makadalit pa og daghang grasya ngadto sa katawhan.

Ang pagdalit sa naghinobra nga grasya matupngan, apan di malabwan diha sa kasingkasing, saludo kami kanimo Sir CJ!