HUGOT nga gikondena sa Integrated Bar of the Philippines-Davao City Chapter (IBP-Davao) ang pagpatay sa usa sa ilang mga miyembro nga si Atty. Sitti Gilda Mahinay-Sapie ug ang iyang bana nga si Muhaimin Sapie duol lang sa ilang panimalay sa Phase 2, Solariega Subdivision, Barangay Talomo, Davao City alas 4 sa hapon niadtong Miyerkules, Hulyo 14.
Matud pa sa gipagawas nga sinuwat-pahayag sa IBP nga ang pagpatay sa magtiayon usa ka pagtamay sa mipatigbabaw nga balaod kon diin ang matag kinabuhi sagrado ug angay nga irespeto ug ang pagsuway og kutlo sa kinabuhi di angay nga pasagdan sa sibilisadong sosyodad.
Nanawagan ang IBP ngadto sa kapulisan ug uban pang tigpatuman sa balaod nga imbestigahan ang pagpatay aron nga patubagon ang mga responsable sa niluog nga krimen.
Samtang nanawagan sab ang IBP ngadto sa gobyerno nga panalipdan ang ilang molupyo ug seguraduhon nga mga abogado ug kadtong nalambigit sa pagpatuman sa hustisya makahimo sa ilang trabaho nga way kahadlok ug pagpanghasi sa ilang kinabuhi.
Nasayran nga ang mga biktima yano lang gipamatay sulod sa kinural nga subdibisyon hapon sa maong adlaw.
Gikanayon ni Davao City Police Office spokesperson Captain Rosario Aguilar nga namatay ang mga biktima bisan pa og gisulayan og dala ngadto sa ospital.
Gihimo na karon ang makuting imbestigasyon sa kapulisan aron nga matumbok ug madakpan ang mga suspek nga nagpaluyo sa krimen.