HUMAN sa usa ka tuig ug tunga nga pagpaalim, mobalik na og duwa si June Mar Fajardo para sa San Miguel Beer.
Ang nag-inusara nga six-time PBA MVP moduwa karong Dominggo para sa Beermen kinsa makigbatok Meralco Bolts didto sa Ynares Sports Arena sa Pasig City sa pagbalik na sa Philippine Basketball Association.
Sugdan ang duwa sa alas 2 sa hapon nga maoy labing unang pagbalik ni Fajardo human sa iyang makalilisang nga injury atol sa San Miguel Practince sa wala pa ang pandemya dala sa Covid-19.
Ang lumad nga taga Pinamungajan Cebu katapusang niduwa niadtong Nobyembre 24,2019 atol sa quarterfinals sa Governors Cup diin nikampyon niadtong higayona ang Barangay Ginebra ug maoy nagpalagpot sa San Miguel nga maoy nagtapos sa tinguha nga grandslam sa ilang team, 100-97 diin si Fajardo nirehistro og 24 puntos ug 18 rebounds.
Si Fajardo gipaubos sa surgery para maayo ang iyang fractured tibia hinungdan nga wala siya makaduwa sa Philippine Cup bubble sa niaging tuig ug napakyas ang San Miguel pagdepensa sa ilang titulo.
Niadtong higayona, ang Meralco Bolts maoy nagpalagpot sa San Miguel human sila napilde sa ilang twice-to-beat advantage sa quarterfinals.
Giangkon ni SMB coach Leo Austria nga adunay kakulian sa rehab ni Fajardo hinungdan nga nalangan ang iyang pagbalik.
Apan bisan paman sa pagkadelatar sa iyang pagbalik gumikan sa infection sa iyang operasyon, ang star sa San Miguel hingpit nga nakarecover sa hustong panahon aron tabangan ang SMB nga makakuha og laing kampyonato.
Nakahatag og igong preparasyon ni Fajardo ang pagkadelatar sa schedule sa opening sa season 46 sa PBA apan ang mga opisyal sa team niingon nga wala sila magdali nga makabalik dayon si Fajardo sa iyang karaan nga duwa sa wala pa ma-injury.
Matod pa ni team manager Gee Abanilla, nga ila unang hinayhinayon si Fajardo ug walay pressure nga gisang-at sa iyang abaga niining iyang pagbalik og duwa gikan sa injury. (PAC)